Трансфер 32,5 миллион фунтга тушди. Бельгиялик ҳужумчи “қизиллар”нинг жорий трансфер бозоридаги биринчи рақамли мақсади сифатида айтиб ўтилганди. Узоқ вақт мобайнида мерсисайдликлар унинг нархини туширишга ҳаракат қилиб кўришди. Охир-оқибат “Ливерпуль” уни сотиб олиш учун шартномада белгиланган банддан фойдаланди. Шу тариқа 24 ёшли ҳужумчи фаолиятини кучлироқ клубда давом эттирадиган бўлди. У жорий ёзда Брендан Рожерс жамоасига Жо Гомес, Натаниэл Клайн, Жеймс Милнер, Роберто Фирмино ва Данни Ингсдан кейин қўшилган 6-футболчига айланди.

Кўчиб ўтиш билан боғлиқ ишлар якунига етгач, Бентеке “Ливерпуль” расмий сайтига биринчи интервьюсини берди.

- Кристиан, Ливерпулга хуш келибсиз. Қандай ҳисларни бошдан ўтказяпсиз?

- Бу ерда бўлишдан жуда бахтлиман. Клуб эгалари, Йэн Эйр ва менежерларга миннатдорчилик билдираман. Улар ўтишим юз бериши учун барча ишни амалга оширишди.

- Бир неча дақиқа аввал шартномага имзо чекдингиз. Ҳозир қандай ҳолатдасиз?

- Барча ҳисларимни шартнома тузиб бўлинган заҳоти юзага чиқаришим қийин, лекин жуда хурсандман.

- Нима учун “Ливерпуль”ни ўзингизга тўғри келадиган клуб деб ҳисоблайсиз?

- Ўйлашимча, ўзим учун мос клубга келдим. Менежер билан суҳбатлашганимда ушбу лойиҳанинг бир қисми бўлишни хоҳлашимни тушундим.

- Охирги йиллирда “Астон Вилла” таркибида “Энфилд”да кўп марта дарвозани ишғол этдингиз. Энди “Ливерпуль” футболчиларидан бирисиз. Жамоа мухлислари қаршисидан ўйнашдан нималар кутяпсиз?

- Бу ерга “Астон Вилла” таркибида келганимда ушбу стадионда ўйнашдан ғаройиб ҳисларни бошдан ўтказганман. Энди сабрсизлик билан майдонга жамоа либосида тушишни кутаман ва ишқибозлар учун курашаман.

- Клуб ҳақида нималарни биласиз?

- Клуб катта тарихга эга. Кўплаб совринларни қўлга киритган, Чемпионлар лигасини 5 марта ютган. УЕФА Кубогида зафар қучган. Унинг кучли клуб эканлигини биламан.

- Сиз жамоага ўтган 6-футболчи бўлдингиз. Янги жамоангиз ҳозирги таркибини қандай баҳолайсиз?

- Бу ерда юқори савияли футболчилар тўпланган. Клубда катта номга эга яхши футболчилар етарли. Бу жамоанинг бир қисми бўлишдан бахтиёрман ва “Ливерпуль”га голларим билан ёрдам беришга интиламан.

- Жамоада бельгиялик футболчилар бор - Симон Миньоле ва Дивок Ориги. Ливерпулдаги ҳаёт ҳақида улар билан суҳбатлашдингизми?

- Ҳозирча йўқ, лекин тез орада кўришамиз. Уларнинг менга ёрдам беришига умид қиламан.

- Англияга кўчиб келганингиздан бошлаб премьер-лиганинг энг яхши ҳужумчиларидан бирига айландингиз. Ўзингизни ҳужумчи сифатида қандай таърифлайсиз?

- Ўзим ҳақимда гапиришим қийин. Мени одамлар баҳолашгани тўғрироқ бўлади.

- 24 ёшдасиз. Жамоа учун ўйнаб, ўсиб, яхшироқ бўла олишни ҳис қиляпсизми?

- Ҳа, албатта. Энг яхши бўлишни ва имкониятимдан унумли фойдаланишни истайман.

- Клуб билан нималарга эришишга умид қиляпсиз?

- Бу ерга совринларни қўлга киритиш ва жамоага голларим билан ёрдам бериш учун келдим.

- Футболчи сифатида сизни нима руҳлантиради?

- Эришилган совринлар. Фаолиятимда бирор нарсага эришишни истайман, кейин бу тўғрисида болаларимга сўзлаб беришим мумкин бўлади.

- “Ливерпуль” мухлисларига нима дейсиз?

- Катта оиланинг аъзоси бўлишдан хурсандман. Мухлисларни бахтиёр қилиш учун барча нарсани қиламан. Улар ва жамоадош дўстларим учун юракдан ишлайман.

КРИСТИАН БЕНТЕКЕ ҲАҚИДА 10 ФАКТ

1. Кристиан Бентеке Киншаса шаҳрида дунёга келган. У ерда АПЛнинг бошқа юлдузлари - Жозе Босингва, Клод Макелеле ва Фабрис Муамба ҳам туғилган.

2. “Астон Вилла”га ўтгунга қадар ҳужумчи “Стандард”, “Генк”, “Кортрейк” ва “Мехелен” клубларида ўйнаган.

3. Премьер-лигада Бентеке 6 марта “Ливерпуль”га қарши майдонга тушган. Ҳужумчи билан “Вилла” 2 марта ғалаба қозониб, 1 марта дуранг ўйнаган. Бенкете ўша ўйинларда 5 марта тўп киритган.

4. Бентекенинг укаси Жонатан Бельгия чемпионати юқори дивизионида “Зульте Варегем” шарафини ҳимоя қилади.

5. 2014/15 йилги мавсумда Бентеке оғир жароҳатга қарамай, 13 гол уриб, тўпурарлар рўйхатида 9-ўринни эгаллади. Жароҳат сабабли Бразилиядаги жаҳон чемпионатини ўтказиб юборганди.

6. У терма жамоада 7 тўп киритган. Дебютини 2010 йилнинг майида Болгарияга қарши ўйинда ўтказган.

7. Бентеке “Ливерпуль”да Симон Миньоле ва Дивок Оригидан кейин бельгиялик 3-футболчи бўлди.

8. 24 ёшли ҳужумчи Бирмингемдан Мерсисайдга кўчиб ўтган 3-ўйинчига айланди. Бунгача “Вилла”дан Стив Макмэхон ва Стюарт Даунинг “Ливерпуль”га ўтган. Тескари йўналишда эса 13 нафар футболчи ҳаракатланган.

9. Бентеке бир қатор ижтимоий тармоқлардан рўйхатдан ўтган: Твиттер (@bentekechris20) ва Фейсбукда (https://www.facebook.com/BentekeOfficial). Энди унинг ўқувчилари сони ортишига шубҳа йўқ.

10. Кристиан Бентеке “қизиллар” собиқ ярим ҳимоячиси, жамоада 1992/93 йилларда 6 учрашув ўтказган Иштван Козма билан бир кунда таваллуд топган.

Беҳзод НАЗАРОВ тайёрлади.

Интервью. Бентеке: "Ливерпуль" катта тарихга эга жамоа"