Ulardan biri yarim himoyachi Dilshod Jo'raevdir. Futbolchi klub bilan 2 yillik shartnoma imzoladi. Malumot o'rnida aytish joiz, Dilshod Jo'raev 2012-2015, 2018 yillar davomida "qaldirg'ochlar" sharafini himoya qilgan. Biz bu borada uning fikrlari bilan qiziqdik.

- Hozirgi "Bunyodkor" avvalgi yillardagidan farq qiladi. Shunday ekan qiyin pallada sobiq jamoangizga qaytishga sizni nima undadi?

- Avvalo shuni aytishim kerakki, men aynan shu klub orqali katta futbolga kirib kelganman. Qolaversa rahbariyat va murabbiy ishonchi ham bunda katta ahamiyat kasb etdi. Qaytishimga shu omillar sabab bo'ldi. Bundan 7-8 yil oldin "Bunyodkor"ning strategiyasi boshqacha edi. Asosan tayyor va tajribali futbolchilarga etibor berilardi. Bugungi kunga kelib yoshlar tarkibning o'zagini yoshlar tashkil qilmoqda. Bu albatta yaxshi. Agarda fikrimizni to'g'ri qilib bir oila bo'la olsak qiyinchiliklarni engib o'tamiz.

- Markazda yani tayanch yarim himoyasida, oldingi chiziqda o'ynagan vaqtingizda tez-tez ko'zga tashlanib turar edingiz. Lekin diqqat markazidan yo'qotib qo'ygandekmiz. So'nggi yillarda murabbiylar sizni himoyaga yaqin joyda o'ynatayotgani tasirimi?

- Murabbiy qaysi poziciyaga qo'ysa, futbolchi o'sha joyda o'ynashi kerak. Sizning gapingiz ham qaysidir manoda to'g'ri. Chunki oldinroqda to'p tepganimda gol urish uchun imkoniyatlar bo'lardi.

- Ayni paytda tarkibda yosh futbolchilar, akademiya tarbiyalanuvchilari ko'pchilikni tashkil qiladi. Jamoada kam sonli tajribali futbolchilardan birisiz. Shu bois bu yil sizdan etakchilikni kutish mumkinmi?

- Ko'p yosh ham demagan bo'lardim. Tarkibda 20dan oshgan yigitlar ham bor. Hammada etakchilikni qo'lga olish imkoniyati mavjud. Barchaga omad tilayman.

- Siz bilan avval gaplashganimizda "Bunyodkor"ga qaytish istagingiz borligini aytgan edingiz. Klubni yaxshi ko'rishingizni bildirgansiz. Balki AGMKda o'zingiz istagandek o'ynamagandirsiz yoki muhitni o'zgartirish niyati tug'ildimi?

- To'g'ri aytdingiz. "Bunyodkor" doim qalbimda bo'lgan. AGMKda oxirgi mavsumda o'zim xohlagandek o'yin amaliyotiga ega bo'lganim yo'q. Futbolchi rivojlanishi uchun maydonga chiqishi kerak. Shunda o'sish bo'ladi, deb o'ylayman. Muhitni o'zgartirishni maqul, deb bildim.

- "Bunyodkor" joriy mavsumda qaysi o'rinlarga kurashadi?

- 2022 yilda xalqaro maydonga 2+2 kvotasi berilgan . Shunday ekan faqat yuqori o'rinlarga kurashamiz. "Bunyodkor" shu kungacha pastki o'rinlar uchun harakat qilmagan. O'tgan mavsumda 2 o'rindagi jamoadan 2 ochko ortda qolishdi.

- Bugungi "Bunyodkor"ning yutug'i nimada?

- Menimcha hozirda yoshlarning asosiy tarkibda o'ynayotgani ular uchun yutuq hisoblanadi. Biz to'p tepgan paytda asosiy tarkibga kirish uchun yillar davomida harakat qilar edik. Raqobat kuchli bo'lardi. "Bunyodkor" yosh futbolchilarga tramplin vazifasini bajarib bermoqda. Fursatdan foydalanib AGMK jamoasiga, rahbariyati, muxlislari, murabbiylar shtabi, futbolchilarga rahmat aytib qolaman. Oz emas, ko'p emas 5 yil o'ynadim. Shu klubning non-tuzini edim. Ikki marotaba bronza meddallariga ega chiqdim. OCHLda ishtirok etdim. Mirjalol Qosimov bilan ishlaganimdan xursandman. Shu bois mazkur klubda to'p tepganimdan hech qachon afsuslanmayman. Darhaqiqat Olmaliqdan ajoyib xotiralar bilan ketdim, deya olaman.

Intervyu. Dilshod Jo'raev: "Men uyga qaytdim"