Ayni damda milliy terma jamoamiz Kuper boshchiligida Suriya va Eron terma jamoalariga qarshi o'rtoqlik o'yinida ishtirok etish mashg'ulotlarni boshlab yuborishgan. Biz O'zbekiston milliy terma jamoasi bosh murabbiyi Ektor Kuper bilan uchrashib terma jamoa haqida suhbatlashdik.

- Hozirgi kunga qadar Ektor Kuper bir nechta mashg'ulot o'tkazdi. Dastlabki yig'inga futbolchilarni jalb qilish borasida kimlar bilan maslaxatlashdingiz?
- Har bir inson birinchi marotaba yangi davlatga kelganda albatta unga kimdir unga yordam berishi kerak. Chunki, bu inson yangi davlat haqidagi muhit haqidagi tasavvurga ega bo'lmaydi. Futbolda ham xuddi shunday. To'g'risini aytaman, men hech bir futbolchi bilan tanish emasman, hattoki ularning ism sharifini ham bilmayman. Tarkib tuzida menga ko'plab odamlar yordam berdi. Alohida bir insonni ajratib ko'rsata olmayman. Bundan avval o'zim superliga o'yinlarini ko'rib, tahlil qilib chiqdim. Avvaldan o'zimga yoqqan futbolchilarning ro'yxati bor edi. Shunday bo'lsa ham o'zbek futbolida azaldan ishlab kelayotgan mutaxassislar bilan maslahatlashgan holda yig'inga jalb qilingan futbolchilarning ro'yxatini tuzib chiqqanmiz. Shuni aytmoqchimanki hozir biz shoshilmasligimiz kerak. Tarkibni shakllantirib olish uchun bizda etarlicha vaqt bor. Bizdan hozirdanoq natija talab qilishmayapti. Futbolchilar bilan yaxshilab tanishib ularning salohiyatini ko'rib olganimdan so'ng, keyingi yig'inlarda tarkib shakllantirib boriladi. Ikkinchi yig'inda umuman boshqa futbolchilar qatnashishi mumkin. Hozirgi holatda biroz sabr qilishlarini so'ragan bo'lardim. Bu birinchi yig'in va birinchi tuzilgan tarkib. Bu doimiy bo'lib qolmaydi. O'z tajribamdan kelib chiqib shuni aytishim mumkinki, butun dunyoda har doim tarkibdan norozi bo'lgan odamlar bo'ladi. Shu kungacha 3-4ta mashg'ulot o'tkazdim. Men sizlarga aniq bir optimal tarkibni ayta olmayman. Superliga o'yinlarini, xorijdagi legioner futbolchilarni kuzatib boraman. Men ko'rib chiqqan futbolchilar mening taktik sxemamga tushadimi yo'qmi shu tomonlarini ko'rib chiqaman. Terma jamoada ko'plab katta o'zgarishlar bo'ladi. Oldin umuman terma jamoaga chaqirilmagan futbolchilarni ham yig'inlarga jalb qilishim mumkin. Hozir birinchi yig'in bo'lgani sababli kengroq ro'yxat tuzdik. Birinchi yig'inga jalb qilingan futbolchilardan faqat eng munosiblari olib qolinadi. Balki ushbu tarkibdan 70-80 foiz futbolchiga ruxsat berib yuborilishi ham mumkin. Biz keyinroq optimal tarkibni shakllantirishga harakat qilamiz.

- Bizda avvaldan bir holat takrorlanib kelingan. Murabbiylar terma jamoaga asosan “Paxtakor”, “Bunyodkor”, “Lokomotiv”jamoalaridan optimal tarkibni shakllantirishgan.“Navbahor”, “Buxoro”, “Qo'qon-1912” jamoalaridan ham futbolchilarni terma jamoa yig'iniga jalb qilishga, ularni ham sinab ko'rishga harakat qilasizmi?
- Yana o'sha holat takrorlanmoqda demagan bo'lardim. Chunki men Toshkentda bo'lib turganimga bor yo'g'i bir hafta bo'ldi. Yana o'sha tendenciyada ishlayapman demagan bo'lardim. Misol uchun Ispaniya terma jamoasining o'zagini “Atletiko Madrid”, “Real Madrid”, “Valensiya” va “Barselona”jamoasi tashkil etadi. Terma jamoalarga ushbu jamoalar ko'p futbolchi etkazib beradi. Bu erda ham shunday holat yuz bermoqda. Shuni aytishim mumkinki, tarkibdagibazi bir futbolchilarni yuzini ham taniy olmayman. Husniddin G'ofurov oldimga kelsa uni taniyolmay qolishim ham mumkin. Shuning uchun hozirdan xulosa chiqarish kerak emas, deb aytgan bo'lardim. Bizning vaqtimiz etarlicha. Undan unumli foydalanamiz. Barchaga birdek yoqadigan tarkib hech qachon bo'lmagan. Shunga yaqinroq tarkib shakllantiramiz. “Lokomotiv” jamoasidan taklif qilingan 10 nafar futbolchidan bor yo'g'i 2 nafari qolishi mumkin. Albatta oldinda o'zgarishlar bo'ladi.

- O'tkazilgan mashg'ulotlardan so'ng qanday fikrdasiz?
- Barcha futbolchilarni shijoat bilan o'zlarini ko'rsatishga harakat qilishmoqda. Bunday holat oxirgacha shunday bo'lib qoladi, deb umid qilaman. Men ushbu futbolchilarda kamtarlikni ko'rdim. Bu juda ham muhim jihat. Zamonaviy futbolda kamtarlik odatiy hol emas. Ko'plab futbolchilar o'zlarini barcha narsani biladigandektutishadi. Bu erda unday narsa yo'q ekan. Hozircha barchasi alo darajada ketmoqda. Futbolchilarning holatini keyinchalik bilib olamiz.

- Terma jamoaga yangi murabbiy tayinlanganda unga barcha narsa tayyor bo'lishi kerak. Sizdan hozircha hech qanday muammo yo'qmi? O'zbekiston futbol assosiaciyasi sizga barcha narsalarni tayyorlab berdimi?
- Hozir hech narsadan shikoyat qila olmayman, barchasi joyida. Albatta, qiyinchiliklar bor. Lekin men uchun hozir eng muhim bo'lgan narsa, men bilan ishlayotgan O'zbekiston futbol assosiaciyasi xodimlarining sharoitlarni yaxshilashga harakat qilayotgan tayyorligi. Hozir barchasi etarli deyishim mumkin. Har bir inson baribir ko'prog'ini xohlaydi.

Jahongir Sotvoldiev suhbatlashdi

Intervyu. Ektor Kuper: “To'g'risini aytaman, men hech bir futbolchi bilan tanish emasman”