Ayni paytda Toshkentda bo'lib turgan mutaxassis Superliga uchrashuvlarini bevosita stadiondan kuzatmoqda. Biz fursatdan foydalanib Luisma Ernandesga bir nechta savollar bilan yuzlandik.

- Janob murabbiy Superliga o'yinlarini tashqaridan kuzatish qanday ko'rinmoqda?

- Mamlakatga qaytgan holda Superliga uchrashuvlarini tomosha qilish, sobiq futbolchilar, do'stlar bilan uchrashish yoqimli. Bu yil jamoalarda o'ziga hos balans va tenglik yuzaga kelgan. Katta farq ko'rmayapman. Har bir jamoada g'alaba qozonish imkoniyati bor. Ko'plab yosh futbolchilarga imkoniyat berilayotganini ko'rish mumkin, hattoki "Paxtakor" kabi katta jamoalarda ham.

- "Metallurg"dan ketganingizdan keyingi hayotingiz va faoliyatingizda nimalar yuz berdi?

- Men hal qilishim kerak bo'lgan ayrim oilaviy masalalar bor edi. Turmush o'rtog'im o'zbek. Orada Ispaniyaga borishga qaror qildik. Murabbiylar ham bazida tanaffus olishga muhtoj bo'ladi. Men shundan foydalandim. Darajamizni oshirish uchun yangi g'oyalar, fikrlar o'rganishimizga to'g'ri keladi. Inson o'rganishdan hech qachon to'xtamasligi kerak.

- "Metallurg" o'tgan yilgidek joriy mavsum ham chempionatni yaxshi boshlay olgani yo'q. Sobiq jamoangizning natijalari qanchalik xayron qoldirmoqda?

- "Metallurg"ning holatidan xafaman. Bekobodda yaxshi do'stlarim, yoqimli xotiralarim bor. Ishonchim komilki, ular bu vaziyatdan tez orada chiqib ketishadi.

- Sizningcha legioner va yulduzlarsiz barqaror jamoani qanday shakllantirish mumkin? Bekobodda ishlaganingizda tarkibda legionerlar bo'lmagandi...

- 2022 yilda bizda legionerlar va yulduzlar emas, jamoa bor edi. Faqat ikkinchi davrada Palichni olganmiz. Tarkibimizda yaxshi mahalliy va yosh futbolchilar bor edi. Bu o'sishning yangi usuli: Tajribali va yosh futbolchilar o'rtasida muvozanat. Ikkinchi usul: Yaxshi saviyadagi legionerlar. Ular mahalliy futbolchilardan farq qilishi kerak 2022 yil yaxshi jamoa qildik. Futbolchilar o'sishga erishdi.

- O'zbekiston chempionligi uchun kimda imkoniyat yuqori?

- Qiyin savol. Yozgi transferlar vaqtida bazi jamoalar tarkibini kuchaytirishi mumkin. Imkoniyat doimgidek "Paxtakor", "Nasaf","Navbahor"da yuqori.

- Ispaniya terma jamoasi Evropa chempionatida yoshroq tarkib bilan ishtirok etmoqda. De la Fuentening ishiga qanday baho berasiz?

- Ha, De la Fuente kuchli va yosh terma jamoani shakllantirmoqda. Aprel oyida texnik tomondan seminarda qatnashdik, u o'zining kerakli maslahatlarini berdi. Yoshlar bilan ishlash yaxshi yo'l ekanligini tushuntirdi. Bizning terma jamoada muvozanat bor deb o'ylayman. Men jamoaga eng yaxshisini tilayman.

- Bugun Gruziya to'sig'idan o'tgan taqdirda Germaniya bilan to'qnash keladi. Ispaniya qaysi bosqichgacha etib boradi?

- Men Evropa chempioni bo'lishlarini istayman. Bu oson emas, lekin terma jamoamizga ishonamiz.

Intervyu. Luisma Ernandes - "Metallurg", Superliga, va Ispaniyaning Evro-2024 turniridagi ishtiroki haqida