Ular orasida “Qo'qon-1912” jamoasida ishtirok etgan va o'zining mazmunli o'yinlari bilan muxlislar olqishiga sazovor bo'lgan Iqbol Malikjonov ham bor. “Neftchi” ga qarshi o'yin oldidan fikrlari bilan qiziqdik.

- Xabarimiz bor, davralar oralig'ida sizga bir nechta klublardan takliflar tushdi. Ular orasidan siz aynan “So'g'diyona”ni tanladingiz. Bunga sabab nima?
- Futbolchi sifatida oldindan ushbu klub ishtirokidagi o'yinlarni kuzatganman. “So'g'diyona” O'zbekistonda o'z o'rniga ega bo'lgan klubdir. Jamoada ko'plab qo'qonlik futbolchilar to'p tepgan. Shu jumladan men ham Aleksandr Mochinov taklifini qabul qildim va hozirgi kunda “So'g'diyona”daman. Buning uchun Aleksandr Mochinovga o'z minnatdorchiligimni bildiraman. Menga bildirilgan ishonchini oqlash uchun harakat qilaman.

- Jamoaga kelib o'z oldingizga qanday maqsadlar qo'ydingiz?
- Avvalo meni “So'g'diyona”ga o'tishimga rozilik bergan va shu kungacha futbol sir asrorlarini menga o'rgatgan No'mon Hasanovga o'z minnatdorchiligimni bildiraman. Bu klubga o'tishim oldinga tashlangan qadam deb bilaman. Jamoaga ko'nikishim qiyin bo'lmad. Hozirda jamoada ichki muhit alo darajada. Maqsadim jamoadoshlarim bilan birga jizzaxlik muxlislarni xursand qilish va “So'g'diyona”ning oldingi mavqeini yanada ko'tarish.

- Dastlabki turda jamoa safarda “Paxtakor”ga mag'lub bo'ldi. “Neftchi” ga qarshi bahs oldidan qanday fikrdasiz va qisqacha tayyorgarlik haqida aytib o'tsangiz...
- Bu yil Superligada 12 ta jamoa qatnashayapti va har bir o'yin murosasiz finalga teng bahslar bo'ladi desam ham bo'ladi. “Paxtakor”ga qarshi o'yin biz uchun og'ir kechdi. Raqib esa O'zbekistonning eng nomdor jamoalaridan biridir. Birinchi bo'lim teng kurashlar ostida kechdi. Ikkinchi bo'limda o'z xatolarimiz evaziga ikkita gol o'tkazib yubordi.Bu esa mag'lubiyatimizga sabab bo'ldi. Navbatdagi raqibimiz “Neftchi” jamoasidir. Ushbu o'yinga jiddiy hozirlik ko'rmoqdamiz. Mashg'ulotlarda esa xatolarmiz ustida ishlayapmiz. “Neftchi”ga qarshi bahsda faqat va faqat g'alaba uchun maydonga tushamiz.

- Muxlislarga tilaklaringiz...
- “Paxtakor”ga qarshi bahsni tomosha qilish uchun jizzaxlik ko'plab muxlislar stadionga tashrif buyurishdi ,bu bizga qo'shimcha kuch berdi. Ishonamanki,“Neftchi” ga qarshi o'z maydonimizda o'tadigan bahsda ham muxlislar bizni qo'llab-quvvatlashadi,jamoadoshlarim bilan birgalikda ularga g'alabani taqdim etishga harakat qilamiz.

Iqbol Malikjonov: "So'g'diyona"ga o'tishim oldinga tashlangan qadam deb bilaman"