Futzal. Osiyo kubogining ilk bahsida qiyin, biroq muhim g'alabani qo'lga kiritdik

Kecha "B" guruhidan joy olgan O'zbekiston terma jamoasi Osiyo kubogi 1-turida Avstraliyaga qarshi bahs olib bordi. Qiyin o'tgan uchrashuv vakillarimizning 3:2 hisobidagi g'alabasi bilan yakunlandi.

Ana shu bellashuvda jamoamiz o'z gollarini urishni boshlab olishga qiynalib turgan paytda Akbar Usmonov bir teginishdagi zarbasi bilan dastlabki golimizni urib berdi. Uyog'iga keyin yana ikkita gol urdik. Shu yigit uchun juda xursandman. O'zbekistonning bir necha karra eng yaxshi futzalchisi bo'lgan hujumchining faoliyatida malum vaqt keskin pasayish kuzatildi, hattoki terma jamoadan chaqiruv olmay qolgan vaqtlar ham bo'ldi. Akbarning o'yinidagi pasayish shaxsiy sabablar tufayli edi. Buni yozishim to'g'ri bo'ladimi yoki yo'q bilmayman. Lekin, yozishga qaror qildim. Hujumchining padari buzrukvorlari uzoq vaqt og'ir hastalik bilan og'rib qolgandilar va o'z-o'zidan futzalchi bunday holatda bor diqqat-etiborini sportga qarata olmas edi. Oila har qanday narsadan ustun. Akalari bilan birga otasining sog'lig'i haqida qayg'urib kelgan Akbarning o'yinida pasayish kuzatila boshladi. Uzoq vaqt davom etgan kasallik bilan kurashdan so'ng uning otasi olamdan o'tdilar. Otasining vafotidan keyin Akbarning ruhiy holati ham izdan chiqqani tabiiy. Hammasini yana izga tushirib olish uchun vaqt kerak edi. Akbar Usmonov o'sha holatdan chiqib keta oldi va yana terma jamoaga chaqirila boshladi. Mana gol ham urdi. Irodali o'yinchi ekanligini ko'rsatdi. O'yinidagi pasayishni ham bartaraf qildi, formaga kirdi, ruhiy tushkunlikni ham engib o'ta oldi.

Akbar odatda klub futzalchisi bo'lib kelgani rost. U o'z jamoasida odatda gollarni qalashtirib tashlaydi, ammo terma jamoada yuqori samaradorlik ko'rsatmasdi. Bu borada vaqtida o'zidan ham intervyu olib so'raganman. Aynan shuning uchun ham uning terma jamoada muhim pallada gol urganidan mamnunman. Hujumchimiz golni qanday emociya bilan nishonlaganini ko'rgandirsiz. Ana shu emociyalar ham yuqoridagi fikrlarimga isbot bo'la oladi. Qaytganing bilan, Usmonov!

Kecha shuningdek Dilshod Rahmatov ikkita gol urdi. Lekin, unga ortiqcha to'xtalmadim. Shunchaki, sardor o'z nomi bilan sardor. DR7 jamoani kerak paytda ortidan etaklay olmoqda. Musobaqada qator yo'qotishlar bilan ishtirok etayotgan Xose Venansio boshchiligidagi futzalchilarimizga omad va zafar yor bo'lsin! Aytgancha, murabbiyning musobaqa oldidan biz chempion bo'lish uchun keldik degan intervyusi ham shaxsan menga yoqdi. Murabbiy Erondek juda kuchli raqib borligiga qaramasdan dangal chempion bo'lmoqchimiz dedi. Bu qatiyati uchun mutaxassisga bo'lgan hurmatim yanada oshdi.

Davron Choriev jarohat sabab Osiyo kubogini o'tkazib yubormoqda. Bundan tashqari, asosiy darvozabonimiz Ravshan Eliboev musobaqa oldidan jarohat sabab qaydnomadan chiqarildi.

Irodali Usmonov!