Вакилларимиз кеча мазкур йиғин доирасидаги илк назорат учрашувида майдонга тушди. Англиялик ўсмирлар рақиблик қилган баҳсда терма жамоамиз 1:3 ҳисобида енгилди. Ушбу ўйин хулосалари бўйича Ўзбекистон U-17 терма жамоаси бош мураббийи Исломбек Исмоилов фикрлари билан ўртоқлашди.

"Бу ўйин биз учун яхши тажриба бўлди. Англия ҳар қандай ёш тоифасида доим дунёнинг энг кучли терма жамоаларидан бири ҳисобланади. Улар прессинг, тезлик ва тўп билан ишлашда бизга нисбатан яхшироқ ҳаракат қилишди. Шунга қарамай, футболчиларим охирги дақиқагача курашишди. Айрим вазиятларда яхши комбинациялар, тўп назорати ва ҳужумга ўтишларда ижобий жиҳатларимизни ҳам кўрдик. Албатта, хатоларимиз ҳам бўлди, айниқса прессингдан чиқишда ва ҳимоя чизиғида. Бундай даражадаги жамоаларга қарши кичик хато ҳам катта оқибатга олиб келади. Умуман олганда мен футболчиларим кўрсатган ўйиндан қониқдим. Энг асосийси улар рақиб ким эканлигига қарамасдан ҳужумкор футбол ўйнашга ҳаракат қилишди",- дейди Ислом Исмоилов.

Маълумот учун, ўсмирларимиз навбатдаги учрашувини 6 сентябрь куни Канадага қарши ўтказади.

Ислом Исмоилов: "Шогирдларим рақиб ким эканлигига қарамай ҳужумкор ўйин кўрсатишга интилишди"