Poytaxtimizdagi TTYMI o'yingohida olib borilgan mashg'ulotlar yakunlangach jamoa sardori Islom Qobilovga o'zimizni qiziqtirgan savollar bilan murojaat qildik.

- Bugundan boshlangan galdagi o'quv-mashg'ulot yig'ini haqida ikki og'iz fikr bildirsangiz...
- Mana bugundan Olimpiada yo'llanmasini taqdim etuvchi Osiyo chempionatiga hozirlikni boshlab oldik. Kayfiyatlar alo. Barcha yaxshi holatda. Umuman olib aytganda hammasi joyida. Reja asosida mashg'ulotlarni o'tkazyapmiz.

- Chiziqlar orasidagi raqobat qanday? Bilamizki avvalgi musobaqada eng kuchli nuqtamiz markaz bo'lgandi...
- Albatta. Markazda raqobat o'ta kuchli. Bir-biriga munosib, kuchli o'yin namoyish etayotgan futbolchilar chaqirilgan deb o'ylayman. Qolaversa sog'lom raqobat muhiti aslo zararga ishlamaydi.

- Quradagi raqiblar to'g'risida nima deya olasiz? Qizig'i biz bilan o'rtoqlik uchrashuvida maydonga tushgan termalar guruhimizdan joy oldi.
- Oldimizda masuliyatli vazifa turibdi. Olimpiya o'yinlariga yo'llanmaga ega chiqish maqsadimiz ekan, har bir jamoani mag'lubiyatga uchratishimiz shart. Albatta, to'g'ri munosabatda bo'lgan holda. Oldingi Osiyo chempionatida Janubiy Koreya va Yaponiyani yirik hisobda enggan edik. Endigi safar ham bunga yana bir bor urinib ko'ramiz.

- Eron olimpiya terma jamoasida bosh murabbiy o'zgardi. Bu ularning uslubiga va o'yiniga tasiri o'tkazadimi?
- Ha, bo'lmasamchi! Har bir murabbiyning uslubi, falsafasi bo'ladi. Shundan kelib chiqib jamoaga o'zgartirish kiritadi.

Abdulaziz suhbatlashdi

Islom Qobilov: “Osiyo grandlarini yana bir bor yirik hisobda mag'lub etishga urinamiz”