Bosh jamoamiz 6 hamda 11 oktyabr kunlari Toshkentda Jahon chempionati-2018 so'nggi saralash raundi doirasida dastlab Eron, so'ngra Xitoy terma jamoalariga qarshi bahs yuritadi.

Hozirda Samvel Babayan shogirdlari poytaxtimizda mazkur o'yinlarga tayyorgarlik olib bormoqda. Yig'inga jami 25 nafar futbolchi jalb etilgan bo'lib, ulardan to'rt nafari “Lokomotiv” azolaridir. “Lokomotiv” va terma jamoamizning ishongan himoyachilaridan biri sanalgan Islom To'xtaxo'jaev oldinda turgan muhim uchrashuvlar oldidan klub matbuot xizmatiga o'z fikrlarini bildirib o'tdi.

- Oldindagi o'yinlarga tayyorgarlik jarayoni yaxshi ketyapti. Dastlab Eronga qarshi o'ynaymiz. Bu raqibni har tomonlama o'rganyapmiz. Umuman olganda, terma jamoamizda ruhiyat yaxshi. Barcha futbolchilar bir maqsadni ko'zlagan holda mashg'ulotlarda ishtirok etishyapti.

Shukrki, hal qiluvchi bosqichni mag'lubiyatsiz boshladik. Endi shu g'alabali seriyani davom ettirishimiz lozim bo'ladi. Ammo bu oson bo'lmasligi tayin. Zero 3-bosqichga oddiy terma jamoalar etib kelgani yo'q. Shu boisdan har bir uchrashuvga 100 foizlik kuch bilan chiqish kerak bo'lmoqda.

Agar shu oldinda turgan ikki o'yin – Eron va Xitoy termalariga qarshi bahslarni ham g'alaba bilan yakunlay olsak, oldinga katta qadam tashlagan va maqsadimiz tomon ancha yaqinlashgan bo'lamiz. Buni barchamiz juda yaxshi tushunib turibmiz.

Ko'psonli ishqibozlarimizni ham, bizning ham orzuimiz – Jahon chempionatiga chiqish. Agar har bir o'yinda muxlislarimiz stadionga kelib, bizni qo'llab-quvvatlab turishsa, biz albatta maydonda borimizni berib harakat qilamiz, - deydi mahoratli himoyachi “Loko” rasmiy saytiga.

Takidlab o'tish joizki, mundial sari yo'lga chiqqan O'zbekiston milliy terma jamosi dastlab 6 oktyabr kuni Toshkentda Eron terma jamoasiga qarshi, so'ngra 11 oktyabrda Xitoy terma jamoasiga qarshi o'yin o'tkazadi.

Islom To'xtaxo'jaev: "Bizning ham orzuimiz – Jahon chempionatiga chiqish"