- Oldindan raqib qanotlardan hujum qilib, asosan 11-raqamli o'yinchisi orqali o'ynashini bilardik. Bunga tayyorgarlik ko'rgandik. Ammo, ikkita vaziyatda etiborni yo'qotdik va raqib o'z imkoniyatidan foydalanib ketdi. Bizda ham vaziyatlar yuzaga keldi, ammo ularni golga aylantira olmadik. Shunga qaramasdan futbolchilar qo'llaridan kelgancha harakat qilishdi. O'yinni ko'rib, tahlil qilib chiqamiz.

- Ikki qavatdagi o'yinimiz haqida nima deysiz ?

- Albatta, ko'rinib turibdiki, raqib o'yinchilari bo'y jihatdan ancha baland. Shu sabab ikkinchi qavatda juda qiyin bo'ldi. Bizning qanot himoyachilar va raqib o'yinchilarining bo'ylari orasida juda katta tafovut bor. Bu ilojsiz narsa. Sababi 168 santimetr bo'yga ega futbolchi 190 santimetrlikni yutishi juda qiyin.

- Hakamlik bo'yicha nima deysiz?

- Nima ham derdik? Bunday turnirlarda yosh futbolchilarni hisobga olish va JCHdek turnirlarni hurmat qilish kerak.

- Terma jamoamiz gol kiritib olganidan so'ng o'yinni biroz tashlab yuborgandek bo'ldi.

- Bu bo'yicha o'tgan o'yindan keyin ham ish olib borgan edik. Birinchi taymdan keyin ham aytib o'tgandik, ruhiyat bilan bog'liq muammo bor. Futbolchilar ko'p holatlarda yoshlik qilishmoqda. Gol urib olgandan so'ng hisobni saqlashga harakat qilishyapti. Biz hech qachon bunday ko'rsatma bermaymiz. Aksincha, gol urgandan so'ng yana olg'a borish kerakligini aytamiz. Ko'p hollarda futbolchilarning ruhiy holati bunga dosh bermayapti. Oldimiz vaqt va imkoniyat bor, buning ustida ham ishlaymiz.

- O'yin davomida, ayniqsa birinchi bo'limda hujum bir tomonga, aniqrog'i Sayfiddin Sodikov tomonga og'ib ketgandek ko'rinmadimi?

- Biz butun o'yin davomida balansni ushlashga harakat qilamiz. Ammo, Sadriddin Hasanov hali o'zining to'liq potencialini ko'rsata olgani yo'q. O'zingiz ko'rib turganingizdek, u to'pni egallagan payti raqibning kerak bo'lsa uch himoyachisi uni yopishga harakat qilmoqda. Shu sabab chap qanotdan hujum uyushtirishda muammo yuzaga kelyapti.

- Ayniqsa birinchi bo'limdagi markazdagi o'yinimiz juda sust bo'lgani haqida nima deysiz?

- Yarim himoyada harakat qilgan o'yinchilarimiz juda qo'pol xatolarga yo'l qo'yishdi. Ayniqsa, texnik xatolar kuzatildi.

- Azizbek Erimbetov jarohatdan qutilganmidi yoki yo'q?

- Ha, unda jarohat bor edi. Ammo, hozirgi paytda uning o'rnini to'ldiradigan o'yinchimiz yo'q. Mana o'tgan o'yinda ham bir futbolchiga imkoniyat berib ko'rdik, ammo u ham bahsga kirishib ketishga qiynaldi. Shu sabab qo'l ostimizda bor o'yinchilardan imkon qadar foydalanishga harakat qilamiz.

- Irlandiya terma jamoasidagi 11-raqamli o'yinchi haqida gapirsangiz. Individual jihatdan kuchli bo'lgan o'yinchi himoyamizga juda ko'p muammolar tug'dirdi.

- Uni tuzilishi, to'p bilan muomala qilishi va o'yinni o'qishi, umuman har tomonlama ideal o'yinchi desa bo'ladi. Har bir murabbiy o'z jamoasida shunday kuchli o'yinchilar bo'lishini xohlaydi. Bizni yigitlar ham undan kam emas va musobaqa davomida o'z imkoniyatlarini namoyon qilishadi.

Islombek Ismoilov: "168 santimetr bo'yga ega futbolchi 190 santimetrlikni yutishi juda qiyin"