21-mart
“Selta” - “Malaga”

Ikki yil avval chempionlar ligasida ishtirok etgan, bir yil avval esa o'sha musobaqaning chorak finaligacha etib borgan va faqatgina qo'shimcha vaqtda “Borussiya”ning o'yindan tashqari holatdan kiritgan goli evazigagina turnirni tark etgan “Malaga”dan bugungi kunga kelib faqatgina mustahkam himoya chizig'i qoldi holos. Biroq Vigodagi o'yinda o'sha mustahkam qo'rg'on ham optimal holatda bo'lmaydi. Chunki jamoaning ikki hiomyachisi - Xesus Gamis va Antunesh diskvalifikaciya qilingan. Undan tashqari Veligtonning o'yindagi ishtiroki ham so'roq ostida. Umuman olganda bu o'yin “Selta” uch ochko olishi va ahvolini biroz bo'lsa-da o'nglab olishi uchun yaxshi imkoniyat. “Selta”ning ushbu mavsumdagi 9 g'alabasidan faqatgina 3tasi o'z maydonida qo'lga kiritilgan.
"SA" taxmini 60% - 40 %

22 mart, shanba
“Granada” – “Elche”

So'nggi turlarda “Granada” ertangi raqiblari “Elche”dan ko'ra yaxshiroq o'yin namoyish etayotganini takidlash lozim. Shundoq ekan tarkiblar ideal holatda bo'lganida ham ushbu o'yinda maydon egalari yaqqol ustunroq hisoblanavererdi. Lekin tarkib borasida mehmonlarda etarlicha muammolar bor ekani “Granada”ning ushbu o'yinda so'zsiz favorit hisoblashga asos yaratib beradi. “Elche”dan sariq kartochkalari yig'ilib qolgani sababli Botia hamda Ruben Peres bu o'yinda ishtirok eta olmaydi.
"SA" taxmini 65% – 35%

“Espanol” – “Levante”

Har ikki jamoaning ham chempionat doirasida yig'gan ochkolari bir xil. To'plar nisabati “Espanol”da ancha yaxshiroq. Maydon egalari kuchliroq tarkibga ega va osonlik bilan raqiblarga taslim bo'lavermaydigan “Levante”ni engishi haqiqatga yaqinroq.
"SA" taxmini: 60% - 40%

“Valyadolid” - “Rayo Valekano”

Ikki jamoa ham so'nggi paytlarda o'yinlarini ancha yaxshilab olishdi. Bu o'yinda o'zaro ro'baro kelayotgan bu jamoalar quyi dvizionga tushib ketish istagida emasligini ko'rsatib qo'yishga intilyapti. “Rayo Vaoekano” so'nggi uch turda 9 ochko ishlagan bo'lsa, “Valyadolid” o'z maydonida ketma-ket olti o'yinda mag'lubiyatga uchramay kelyapti. Qiziq tomoni “Valyadolid” chempionat davomida hammadan ko'proq durang natija qayd etgan (11 marotaba). “Rayo” esa aksincha, eng kam durang o'ynagan jamoa hisoblanadi (2 bora).
"SA" taxmini: 50%-50%

“Atletik” – “Xetafe”

“Atletik” Chempionlar Ligasi yo'llanmasi uchun kurashyapti. “Xetafe” esa 13 turdan buyon g'alaba nimaligini bilmay kelyapti. Biroq basklar tarkibida ularning asosiy markaziy hujumchisi Adruris ham, ko'pincha uni almashtiradigan Kike Sola ham maydonga tushishmaydi. Katta ehtimol bilan hujumda 23 oydan buyon gol ura olmay kelayotgan hujumchi Tokero yoki bo'lsama bir oy ilgari o'zining Ispaniya chempionatidagni ilk golini kiritgan yosh forvard Gilermo tushirilsa kerak.
"SA" taxmini: 65%-35%

23 mart, yakshanba
“Osasuna” – “Sevilya”

“Osasuna” ushbu bahsga bir hafta tayyorlangan bo'lsa, “Sevilya” hafta o'rtasida, aniqrog'i payshanba kuni Evropa Ligasi doirasida “Betis”ga qarshi 120 daqiqa davom etgan qiyin o'yinni o'tkazishiga to'g'ri keldi. Ushbu drammatik o'yindagi ajoyib g'alaba Sevilyaliklarga alo kayfiyat tuxfa etgan bo'lsa-da, yo'qotilgan kuchni bunday qisqa vaqt ichida tiklab olish juda mushkul. Xullas, “Osasuna”da to'rt o'yindan beri chempionat doirasidagi o'yinlarni yutib kelayotgan “Seviya”ning g'alabali seriyasini to'xtatish uchun yaxshi imkoniyat bor.
"SA" taxmini: 60%-40%.

“Betis” – “Atletiko”

Evropa ligasidagi og'ir o'yindan keyin “Betis” chempionlik uchun kurashayotgan va haddan tashqari yuqori notadagi chog'lanish bilan maydonga tushadigan “Atletiko”ga qarshilik qilish qiyin bo'ladi. Diego Simone jamoasi ushbu o'yinda g'alaba qozonadigan bo'lsa, kamida to'rt soatga birinchi o'ringa chiqib olishini juda yaxshi biladi. Agar “Barselona” safarda “Real”ni mag'lub eta olsa, etakchilik pog'onasi keyingi turgacha ham “Atletiko”ga tegishliligicha qolishi ham mumkin.
"SA" taxmini: 30%-70%.

“Valensiya” – “Vilyarreal”

Valensiya provinciyasidagi ikki eng yaxshi jamoalar o'rtasidagi o'yinlar har doim ham yuqori bosim ostida kechadi. Bir necha mavsum davomida “Valensiya” hamda “Vilyarreal” uchinchi o'rin uchun bir-biri bilan kurashib kelishdi. Hozir esa “Valensiya”ga Evropa Ligasiga yo'llanma beruvchi o'rin uchun sakkiz ochko etmayapti. Evropaning ikkinchi darajali musobaqasiga yo'llanma beradigan o'rinda mustahkam o'rnashib olgan “Vilyappeal” esa Chempionlar Ligasi yo'llanmasi uchun kurashishi juda qiyin maslaga aylanib qoldi. "Atletik”dan ochko bo'yicha ancha ortda qolib ketishgan. Shundoq ekan “suv osti kemasi” durangdan ham qoniqsa kerak.
"SA" taxmini: 55%-45%

“Real Madrid” – “Barselona”

Madridning “Real” klubi 2014 yil avvalidan buyon juda ajoyib formada ekanini namoyish etib kelmoqda va mavsum boshida duch kelgan muammolarini bartaraf etgandek. Birinchi davradagi “Klassiko”da madridliklar “Barsa”ga 1:2 hisobida mag'lub bo'lgandi va o'yindagi yagona golini so'nggi daqiqalarda kiritgandi. Umuman olganda Anchelotti shogirdalri aynan o'sha o'yindan buyon hech kimga mag'lub bo'lmay kelyapti - 26 g'alaba va 5 durang.

Uning ustiga so'nggi 15 o'yindan 10tasida “Real” umuman gol o'tkazmagan. Biroq “Barsa” ham hozir yaxshi formada. Messi soppa-sog' va jangga tayyor. Inesta ham so'nggi vaqtlarda ajoyib sport formasida ekanini ko'rsatib kelyapti. Undan tashqari “Barsa” bu hafta to'laligicha dam olgan. “Real” esa Chempionlar Ligasi doirasida o'yin o'tkazganini bilasiz. O'z uyida o'ynashi vajidan “Real” favoritdek tuyulishi mumkin. Biroq “Barselona” ham chempionlik poygasida ortda qolib ketmalik uchun “Santyago Bernabeu”da g'alaba qozonishi shart ekanini to'liq tushungan holda maydonga tushishini unutmaslik lozim.

"SA" taxmini: 50% - 50%

24 mart, dushanba
“Almeriya” – “Real Sosedad”

“Almeriya” so'nggi besh turda bor yo'g'i bir ochko to'plashga muvaffaq bo'ldi va chempionatni tark etuvchi xavfli zonaga tushib qoldi. O'zidan ancha kuchli jamoaga qarshi kechadigan o'yinda maydon egalariga sariq kartochkalari ko'paib ketgan hujumsi Rodri yordam bera olmaydi. Shundoq ekan bu o'yinda Chempionlar Ligasi yo'llanmasini qo'lga kiritish uchun “Atletik”ni taqib qilayotgan “Sosedad” g'alaba qozonishi ehtimoli yuqoriroq.
"SA" taxmini: 35% - 65%

Abror Qodirov tayyorladi.

Ispaniya chempionati 29-tur prevyusi. “El Klassiko” va boshqa o'yinlar