Kristian Ansaldi. "Atletiko M". Felipe Luisning o'rnini bosish uchun "Zenit"dan olingan ushbu futbolchi saviyasi Primeroga to'g'ri kelmasligini ko'rsatib qo'ydi

Gilerme Ochoa. "Malaga". JCH-2014da o'zini har tomonlama ko'rsata olgan meksikalik posbonga bir qancha grandlar tomonidan qiziqish bildirilgandi. Lekin, u "Malaga"ni tanladi va ayni paytda zahira o'rindig'ida o'tiribdi

Isaak Kuenka. "Deportivo". "Barselona" yulduzlari orasida o'zini ko'rsata olmagan futbolchidan "Deportivo"da ko'p narsa kutishgandi. Ammo, lekin, biroq... U mavsumda bor-yo'g'i ikkita gol kirita oldi

Mark-Andre ter Shtegen. "Barselona". Germaniyalik darvozabon ham o'z jamoasida ikkinchi raqamli posbon hisoblanadi. Ming afsuslar bo'lsinki, mana shunday iqtidor egasi Klaudio Bravoning soyasida qolib ketmoqda

Yago Aspas. "Sevilya". Andalusiyaliklar safida o'zini ko'rsata olmayotgan futbolchi aslida "Liverpul" futbolchisi hisoblanadi

Keylor Navas. "Real". Iker Kasilyasdek darvozabon turganida Navasning zahirada o'tirishi balki oddiy holdir. Lekin, baribir mana shunday darvozabonning ikkinchi raqam ostida harakat qilishi achinarli

Alvaro Negredo. "Valensiya". "Manchester Siti"dan ijaraga olingan futbolchi jarohati sababli bor-yo'g'i 5 ta gol kirita oldi. Hujumchi uchun juda yomon natija, shunday emasmi?

Xoel Kempbell. "Vilyareal". "Arsenal" futbolchisi hisoblangan futbolchi ham JCH-2014 vaqtida jamoasining chorak finalga chiqishiga katta hissa qo'shgandi. Lekin, klub safida u o'zini ko'rsata olmayapti

Duglas Pareyra. "Barselona". Mavsumda bor-yo'g'i bir marotaba maydonga tushgan futbolchi keyingi mavsumda ko'p ehtimol bilan boshqa jamoaga ijara asosida yo'l oladigan ko'rinadi

Alessio Cherchi. "Atletiko". "Torino"dan katta umidlar bilan harid qilingan futbolchi Ispaniyada o'zini ko'rsata olmadi va yana Italiyaga qaytarib yuborildi. Faqat u hozircha "Milan"da ijara asosida o'ynaydi

Horij saytlari asosida Aziz To'xtamurodov tayyorladi

Ispaniya. Mavsumning eng omadsiz transferlari