Ispaniya Segundasi deb nomlanuvchi ligada 22ta klub Ispaniya primerosiga chiqish uchun kurash olib boradi. Dastlabki ikki o'rinni olgan klublar to'g'ridan to'g'ri yo'llanmaga ega bo'lishadi. Keyingi o'rinlarni olgan 4ta klub o'zaro pley-off orqali bitta yo'llanma uchun kurash olib borishadi.

Oxirgi 4ta o'rinni band etgan klublar esa uchinchi divizionga tushib ketadi.

Ayni paytga kelib 10ta tur ortda qoldi. 110ta o'yinda jamoalar jami 269ta gol urishdi. O'rtacha har bir o'yinga 2,45tadan gol to'g'ri keladi.

Ayni paytda 20 ochko to'plagan "Osasuna" klubi peshqadam bo'lib turibdi. Ushbu jamoani 59 yoshli Enrike Martin boshqarib bormoqda. "Osasuna" 2000-2014 yillarda Ispaniya primerosida ishtirok etgan. 2005 yilgi mavsumda Ispaniya kubogi finalida o'ynagan, 2006 yilda esa Ispaniya chempionatida to'rtinchi o'rinni olgandi.

Ikkinchi o'rinni 19 ochko bilan "Kordoba" klubi egallab turibdi. Uzoq muddatli tanaffusdan so'ng o'tgan mavsumda Ispaniya primerosiga chiqqan "Kordoba" birinchi yildayoq yana segundaga tushib ketgandi. Xose Luis Oltra boshchiligidagi jamoa bu mavsumda yana oliy divizionga chiqish uchun kurashmoqda.

Keyingi o'rinlarni 16 ochko olgan "Alkorkon", "Saragosa", "Alaves" va "Ximnastik" kabi klublar egallab turishibdi.

So'nggi to'rtta o'rinda "Tenerife", "Llyagostera", "Atletik B", "Almeriya" kabi klublar joylashishgan.

10ta turda 8ta gol urgan "Alkorkon" hujumchisi David Rodrigez hozircha to'purarlar poygasida birinchi o'rinda bormoqda. U o'tgan mavsum 20ta gol urishga erishgandi va bu borada to'rtinchi bo'lgandi.

Undan bitta kam gol urgan "Ponferradina"ning braziliyalik hujumchisi Yuri Fonseka ikkinchi o'rinda bormoqda. "Osasuna" yarim himoyachisi Roberto Torres Morales 6ta gol urdi.

Sentyabr oyida segundada "Osasuna" ustozi Enrike Martin eng yaxshi murabbiy deb topildi. "Elche" hujumchisi Serxio Leon eng yaxshi futbolchi sifatida tan olindi.

Hozirgacha eng ko'p tomoshabin "Saragosa" - "Osasuna" o'rtasidagi o'yinga tashrif buyurdi. 20 sentyabr kungi uchrashuvni tomosha qilish uchun 18649 tomoshabin keldi. Eng kam tomoshabin "Llyagostera" - "Alaves" o'yiniga keldi - 1115.

Narzulla Saydullaev

Ispaniya. Quyi ligada nima gap?