Joriy mavsumda "Istaravshan" tarkibida tajribali yarim himoyachi Jamshid Hasanov va Azamat Isroilov o'zlarini ko'rsatishmoqda. Xususan, Hasanov raqiblar darvozasiga 3 ta gol urgan bo'lsa, Azamat Isroilov 6 ta assistni qayd etib ulgurdi. Biz esa ularning biri Jamshid Hasanovning fikrlari bilan qiziqdik.

- Mavsum boshidagi qishki o'quv-mashg'ulot yig'inlarida o'zbek klublarining mashg'ulotlarida qatnashdingiz. Lekin hech bir jamoa bilan shartnoma imzolaganingiz yo'q?

- To'g'ri, o'zbek klublaridan takliflar bo'ldi. Lekin ayrim sabablarga ko'ra o'zimni Tojikiston chempionatida sinab ko'rishga qaror qildim.

- "Istaravshan"ga o'tish qanday amalga oshdi?

- O'tgan mavsum tugamasidan oldin No'mon aka Hasanov taklif bilan chiqdilar. Ular bilan avval birga ishlaganman, talablarini bilaman. Shu bois ortiqcha o'ylab o'tirmasdan taklifga rozilik berdim.

- Demak, murabbiy roli bunda katta bo'ldi?

- Albatta. No'mon Hasanov taklif qilmaganida Tojikiston chempionatiga bormagan bo'lardim.

- Siz uchun mavsum qanday o'tyapti?

- Hozircha 3 ta gol, 1 ta assist qayd etib ulgurdim. Mavsum yaxshi o'tmoqda. Men bilan birga Azamat Isroilov ham sermahsullik qayd etmoqda. Undan tashqari Jahongir Ahmadov, Javohir Rasulov va yana o'zbek futbolchilari o'ynayapti. Ular ham har bir uchrashuvda jamoaga foyda keltirishga harakat qilmoqda deya olaman.

- Eshitishimizga qaraganda Tojikiston grandi "Istiqlol" sizga taklif bilan chiqqan ekan?

- Ha, "Istiqlol" bosh murabbiyi Nikola Lazarevich jamoasiga taklif qildi. Lekin "Istaravshan" bilan 1 yillik shartnomam bor. Agar klubim ketishimga qarshilik qilmasa albatta "Istiqlol"ga boraman.

"Istaravshan"da javlon urayotgan Jamshid Hasanovga Tojikiston grandi haridor. Uning o'zi nima deydi?