Гап шундаки, B Серияда одатда 22 жамоа иштирок этади. Аммо Италия футбол федерацияси жорий йилдан эътиборан жамоалар сонини 19тага қисқартиришни маъқул топган. Бу эса кенг жамоатчилик томонидан кескин танқидларга учрамоқда ва муҳокамаларга сабаб бўлмоқда.

Бу форматда B Серияда эндиликда ҳар турда 1 жамоа дам олишига тўғри келади. Шунингдек, пастки табақадан қўшилиши керак бўлган 3 жамоа ўрнига чемпионат форматини ўзгартириб, лигани 19 жамоа билан давом эттириш қароридан Италиядаги Футболчилар Иттифоқи раиси Дамьяно Томмази норози.

- "Қайта-қайта такрорлайман, чемпионатни 19 жамоа ўтказиш қарорига мутлақо қаршиман. Тўғри, Италия футбол федерацияси қарор чиқаришдан аввал биз билан маслаҳатлашди, фикримизни сўради. Аммо мени фикрим ўзгармайди. Мен бундай форматга қаршиман. Форматни ўзгартириш - Италия футбол федерациясининг бизнинг устимиздан кулишини англатади", - дейди Томмази.

Италия Про Лигаси президенти Габриэле Гравина ҳам формат ўзгаришига мутлақо қаршилик қилганини таъкидлади.

- "B Серияга чиққан жамоаларнинг Италия футбол федерациясига берган қайдномаларини қабул қилмаслик бу кечириб бўлмас хато. Умид қиламанки, Италия футбол федерациясининг бу қарори бўйича назорат органлари керакли чора кўришади", - деди Габриэле Гравина.

Италия B Сериясининг янги мавсумига 11 кун қолганида қуръа (бугун) ташлаш маросими ўтказилди. Аммо ҳалигача баҳс ва мунозаралар давом этмоқда.

Италия футболида можаро: B Серия форматига ўзгартириш киритилди