"Qo'qon-1912"ning serbiyalik himoyachisi Ivan Yosovich "Lokomotiv"ga qarshi kechgan uchrashuvdan so'ng saytimiz muxbiri Abdulaziz Iskandarovga o'yin borasidagi mulohazalarini bildirdi.

- O'yin haqida...

- Avvalgi 3ta uchrashuvda maksimal darajada harakat qilgan bo'lsakda, kichkina xatolar evaziga mag'lubiyatga uchrayotgandik. Qaysidir manoda omadsizlik desam ham bo'ladi. O'yin davomida boringni berasan, harakat qilasan, lekin yakunda yutqazasang alam qiladi. Xudoga shukur kecha "Lokomotiv"ni mag'lubiyatga uchrata oldik. Mazkur g'alaba o'zimizga bo'lgan ishonchni qaytargan bo'lsa ajab emas. Buni keyingi o'yinlarda bilib olamiz. Oldindagi raqiblar bilan ham oson bahs kechmasligi aniq. Ammo bizni g'alabadan boshqa natija qoniqtirmaydi. Turnir jadvalidagi o'rnimizni yaxshilab olishimiz uchun ko'proq ochko jamg'arishimiz lozim.

- Statistikaga qaraydigan bo'lsak, jamoa kecha raqib darvozasiga 3ta zarba yo'lladi. Ularning 2tasi gol. "Lokomotiv" esa ustunlikni qo'liga oldi, ko'plab hujumlar tashkil qildi. Biroq vaziyatlardan foydalana olmadi. Kecha chinakamiga "Qo'qon-1912"ning omadi keldimi?

- Omad kelishi uchun ham harakat qilish kerak. O'z-o'zidan osmondan tushmaydi. Qiziq holat shuki, "Nasaf", "Neftchi"ga qarshi o'yinlarda oxirgi daqiqalarda gol o'tkazib mag'lubiyatga uchragan edik. Kecha shuning teskarisi yuz berdi.

- Markaziy himoyada Murod Holmuhammedov bilan yaxshi tandem hosil qilasiz. Uning qaytishi jamoaga ko'tarinki ruh berdimi?

- Bosh murabbiyimizni qiynayotgan muammolardan biri jarohatlar va yo'qotishlar hisoblanadi. Tarkibdagi har bir futbolchining o'rni bor. Murod esa jamoamizning haqiqiy etakchisi. Dilshod Rahmatullaev, Aleksandr Merzlyakov, Oybek Rustamov safimizga qaytsa yanada kuchli bo'lamiz.

- "Qo'qon-1912" so'nggi yillarda boshqalarga qaraganda "Lokomotiv" uchun chaqilmas "yong'oq"qa aylanib bormoqda...

- Ular juda yaxshi o'yin ko'rsatishdi. Jamoani yosh murabbiy boshqarmoqda. Shunga qaramay maydonda uning imzosi bor. "Lokomotiv"ga keyingi uchrashuvlarda omad tilayman. Savolingizga yakun yasaydigan bo'lsam, balki biz bu jamoaga noqulay raqibdirmiz (kuladi).

Abdulaziz Iskandarov suhbatlashdi

Ivan Yosovich: "Balki "Qo'qon-1912" "Lokomotiv" uchun noqulay raqibdir"