O'yin haqida

- "Sho'rtan" jamoasini g'alaba bilan tabriklayman. Moliyaviy xolat tufayli o'yin kuni etib keldik. Shuningdek, Birinchi ligada 1-tur o'yinimiz qoldirilgani tufayli kirishib ketishimiz qiyin bo'ldi. Ikkinchi bo'limda charchoq alomatlari sezildi.

- Asosiy tarkibdan ko'nglingiz qanchalik to'ldi?

- Asosiy tarkibdan ko'nglim to'ldi. Birinchi bo'limda yaxshi harakat qildik, barcha ko'rsatmalar to'g'ri bajarildi. Ikkinchi bo'limda tajribali futbolchilarni tushirib o'yinni yanada kuchaytirishni maqsad qilgandim. Biroq, tajribali futbolchilarda ham jismoniy jihatdan muammolar ko'zga tashlandi. Ular raqibga o'z poziciyalarini boy berishdi va yakunda bu mag'lubiyatga olib keldi.

- Ikkinchi va uchinchi gollar etiborsizlik tufayli yuzaga keldi deb o'ylaysizmi?

- Ikkinchi gol yigitlarga ruhan tasir qildi. Bilmadim, menga shunday ko'rindi, ikkinchi golda o'yindan tashqari xolat bordek edi. O'yinni ko'rib chiqamiz va o'sha vaziyatni tahlil qilamiz. Ikkinchi goldan so'ng jamoamizda poziciyalar bo'yicha tarqoqlik ko'zga tashlandi.

- "Yangier"da mavsum avvalidayoq moliyaviy muammolar bormi?

- "Yangier" xususiy klub, o'zini o'zi taminlaydi. Xomiylarimiz xususiy klublar borasidagi yangi qaror chiqishini kutishayapti. Shu qaror chiqsa, xususiy klublar uchun imtiyozlar berilsa, moliyaviy imkoniyatlarimiz barqaror xolatga kelishidan umid qilayapmiz.

- "Sho'rtan" jamoasi haqida fikringiz...

- "Sho'rtan"ni tajribali mutaxassis boshqarayapti. Aleksey Estafeevni yaxshi bilaman, u raqobatbardosh jamoa tuzayotgani ko'rinib turibdi.

Jahongir Jiyamurodov: "Yangier" xususiy klub, o'zini-o'zi taminlaydi"