Шу тариқа биринчи даврани мағлубият билан якунлаган "темирйўлчилар" танаффусга йўл олишди. Мавсум бошида таркибга бир қатор маҳоратли футболчиларни ва португалиялик мураббийни жалб қилган "Локомотив"нинг қайд этаётган натижаларини қониқарли, деб бўлмайди. Жамоа 12-турдан сўнг турнир жадвалида 15 очко тўплаган ҳолда тўққизинчи ўринда бормоқда. Чемпионлик учун курашиши кутилган клубнинг бундай натижалари кўпчиликни ажаблантираётгани табиий. Микаэль Секейра тажрибали футболчилар хизматидан фойдаланиш билан бир қаторда, ёшларга ҳам ишонч билдирмоқда. Улардан бири Жалолиддин Жумабоевдир. Ўтган мавсум бош жамоада ўзини кўсатишни бошлаган футболчи бу йил ҳам асосий таркибга кириш учун рақобтлашмоқда. "Пахтакор" билан ўйиндан сўнг Жумабоев шу ва бошқа мавзулар ҳусусида фикрлари билан ўртоқлашди.

"Пахтакор" билан кечган дерби ҳақида

- Икки жамоа ҳам ғалаба учун ҳаракат қилгани яққол кўринди. Фикримча яхши ўйин ўтказдик. Лекин якуний натижа бундай бўлмади. Ўз хатоларимиз эвазига дарвозамиздан иккита тўп олиб чиқдик. Биринчи бўлимда ёмон ўйнамадик. Сўнгги сонияларда эътиборсизлик оқибатида рақиб бизга гол урди.

"Локомотив" "Пахтакор"дан қўрқиб ўйнадими?

- Гарчи бешта ҳимоячи билан майдонга тушган бўлсакда, бу рақибдан қўрққанимизни англатмайди. Қанотлардаги иккита ҳимоячимиз ярим ҳимоячи вазифасини ҳам бажаришди ва ҳужумларга тез-тез қўшилишди. Майдонда ҳамма бор кучи билан ҳаракат қилди.

Биринчи даврадаги муваффақиятсизлик ва янги мураббийнинг услубига мослашиш

- Биринчи даврани бундай натижа билан якунлаганимиздан хурсанд эмасман. Биз бундан ҳам яхшироқ кўрсаткич қайд эта оламиз. Қайсидир маънода португалиялик мураббий Микаэль Секейранинг услубига ва фалсафасига мослашиш жараёнини ўтказдик, дея оламан. Янги мураббий, янги футболчиларнинг бир-бирини тушуниб олиши учун вақт керак бўлди. Ўйлайманки, иккинчи даврада ижобий натижалар билан мухлисларни хурсанд қила оламиз.

Микаэль Секейра қандай янгилик бера олди?

- Мураббий ўзининг европача қарашларини олиб кирмоқда. Агарда биз шуни максимал даражада ўзлаштирсак ҳаммаси яхши бўлади. Ҳар бир мураббийнинг ўз услуби бор. Микаэль Секейрада ҳам шундай.

Кучли футболчилар билан рақобатган тайёрми?

- Жамоага янги футболчилар келиши ҳақида эшитганим йўқ.Рақобатга ҳамиша тайёрман. Соғлом рақобат бор жойда ўсиш ва ривожланиш бўлади. Тажрибали футболчилардан ўзим учун фойдали томонларини ўзлаштиришга ҳаракат қиламан. Кўпроқ ўрганишга интилмоқдаман.

Абдулазиз Искандаров суҳбатлашди

Жалолиддин Жумабоев: "Локомотив" "Пахтакор"дан қўрқиб ўйнагани йўқ"