Вакилларимиз кеча Озарбайжон U-18 терма жамоаси билан куч синашди (0:0). Учрашувдан сўнг терма жамоамиз бош мураббийи Жамолиддин Раҳматуллаев фикрларини билдирди.

"Кечаги Озарбайжон жамоасига қарши ўйинга келадиган бўлсак, ўйин ёмон бўлмади. Футболчилар берган кўрсатмаларимни максимум даражада бажаришга ҳаракат қилишди. Тўғри, ўйинда ҳисоб очилмади, реализацияда муаммолар бўлди. Буни таҳлил қилиб, албатта, машғулотларда ишлаймиз. Энг муҳими, биз жуда кўп голли вазиятлар яратдик. Рақиб кўпроқ ҳимояга эътибор қаратган бўлса-да, бизда етарли имкониятлар бўлди.
Футболчиларга қўйилган вазифаларимдан яна бири — тўпни йўқотгандан кейинги ҳолатимиз эди. Бу жиҳатда ҳам йигитлар яхши кўринишди. Тўғри, ҳали ишлашимиз керак бўлган жиҳатларимиз жуда кўп, лекин охирги икки йиғинда йигитларнинг ҳар томонлама прогресси мени хурсанд қилмоқда. Биз нафақат майдондаги ҳолатларни, балки майдон ташқарисидаги, яъни муҳитни, жамоавий бирдамликни, футболчиларнинг ўзларига бўлган ишончини ва, албатта, ватанпарварлик руҳини оширишга ҳаракат қиляпмиз.
12 октябрь куни иккинчи ўйинимизни ўтказамиз. Бу баҳсда қолган йигитларга ҳам имконият беришни режа қилганман. Ишончим комилки, улар ҳам ўзларига берилган имкониятдан максимум даражада фойдаланадилар", - дейди Жамолиддин Раҳматуллаев.

Жамолиддин Раҳматуллаев: "Ишлашимиз керак бўлган жиҳатлар кўп"