- Мен бир неча йил аввал, Аниқроғи 2012 йилда «Янгиер» жамоасидан «Машъал» сафига қўшилганман. Мана беш мавсум мобайнида «газчилар» сафида тўп тепдим, Муборакда кўплаб дўстлар ортирдим футбол сир асрорларни ўргандим, - дейди Жамшид Ҳасанов.

- «Машъал»ни тарк этишингизга нима сабаб бўлди?
- Ҳеч қандай жиддий сабаб йўқ, ўзимни бошқа жамоада синаб кўрмоқчи бўлдим холос.

- «Қўқон-1912» жамоасига сизни ким таклиф этди?
- Нўъмон ака Ҳасанов таклиф этди, бошқа таклифлар ҳам бор эди. Аммо мен «Қўқон-1912» жамоасини танладим, ўйлайманки бу қарорим тўғри бўлди.

- Сиз учун «Машъал»да қадрли нима қолди?
- «Машъал» ва Муборак менинг иккинчи уйим эди. Ахир беш йил бу ерда ўйнадим, бутун жамоа менинг қадрдон дўстларим ўз оиламдек эди. Мен учун «Машъал» жамоаси ҳамиша қадрлидир. Қачондир яна Муборакда тўп тепишимга ишонаман.

- «Газчилар» таркибидаги энг кучли футболчи ким деб ўйлайсиз?
- Қийин савол, «Машъал» ўзи кучли жамоа бунга ўтган мавсумда, «Бунёдкор» билан бўлган иккита баҳсда дуранг, «Бухоро» ҳар икки баҳсда мағлуб этилди. Қолаверса «Насаф» ҳам Муборакда ожиз қолдирилди. Булардан ташқари «Пахтакор» айнан «Машъал» билан баҳсдаги дуранг тажидан кейин, мавсумни медалларсиз якунлашга мажбур бўлди.

- Муборак халқи ва «Машъал» мухлисларига тилакларингиз.
- Aввало клуб раҳбарияти ҳусусан, Илҳом Қурбоновга ҳамда барча мутасадди раҳбарлар, жамоадошларимга ўз миннатдорчилигимни бидириб қоламан. «Машъал»га омад ёр бўлсин жамоа яна ОЧЛ мусобоқаларига қайтсин. Муборак халқига ҳамиша тинчлик хотиржамлик, хонадонларидан файз барака аримасин. Мен ҳамиша «Машъал» ва Муборак ҳалқи билан биргаман.

«Машъал» матбуот хизмати

Жамшид Ҳасанов: "Машъал" ва Муборак менинг иккинчи уйим эди"