- Yangi mavsum qiziqroq o'tishini kutyapman. Chempionlik va yuqori o'rinlar uchun kurashadigan jamoalar soni oshib, chempionatda intriga kuchayishiga umid qilaman. Bundan barchaga foyda. Futbolimiz va jamoalarimiz saviyasi ham oshadi, - takidladi Iskanderov yangi mavsum haqida.

"Andijon" bilan dushanba kuni o'tadigan bellashuv haqida to'xtalar ekan, Jamshid bahsda osonlik bilan g'alaba qozonilmasligini aytib o'tdi.

- Har doim mavsumdagi birinchi uchrashuv og'ir o'tadi. Chunki raqib jamoaning o'yin uslubi va yangi futbolchilari qanday o'ynashini aytish mushkul. Yangi murabbiy kelgach, taktika va o'yinchilarda o'zgarish bo'ladi. Shu sababli raqibni to'liq o'rganib chiqishning iloji yo'q. Albatta, bu jamoaga xos bazi jihatlarni bilamiz. O'yinini o'rganishga intildik. Ular endi jamoani shunday o'yinlarga ruhan yaxshi tayyorlay oladigan murabbiyga ega. Himoyada juda jips harakat qilishlari mumkin. Shuning uchun uchrashuv oson o'tadi deb o'ylamayman, - deydi Jamshid Iskanderov.

"Paxtakor" matbuot xizmati

Jamshid Iskanderov: "Mavsum qiziqroq o'tishini kutyapman"