O'yin haqida

- Albatta, qiyin o'yin o'tkazdik. Birinchi bo'limda "Surxon" vakillari ko'proq imkoniyatlarga ega bo'lishdi. Biz uchrashuvning birinchi qismida bo'sh o'yin ko'rsatdik. Ikkinchi bo'limda o'yinimiz jonlandi, vaziyatlar yaratdik. Biroq birgina xato qimmatga tushdi. Raqib aynan o'sha xatodan foydalanib gol urib ketdi.

- Kuxianidze nega ertaroq almashtirilmadi?

- U harakat qildi, faol bo'lishga intildi. Yomon o'ynadi deb ayta olmayman. Ikkinchi bo'limda yangi kuchlarni maydonga tashlab, o'yinni kuchaytirishga harakat qildik.

- Asror G'ofurov bilan bog'liq vaziyatdagi fikringiz?

- Vaziyatga baho beruvchi hakamlar va o'yin nazoratchilari bor. Buni muhokama qilish mening vakolatim doirasidagi ish emas. Hakam vaziyatni ko'rdi, VAR orqali ham tahlil qildi. Ishonch bilan shunday qarorga kelgan ekan, biz bunga etiroz bildirmaymiz. Kimdir jiddiy jarohat olib qolmasligi tarafdorimiz.

- Kubokdagi o'yinda jamoangiz asosiy tarkibda o'ynamagandi. Shu bois balki futbolchilarga bir oz tonus etishmagandir?

- Bo'lishi ham mumkin. Balki noto'g'ri hamdir. Bu futbol, oldindan nima bo'lishini bilmaymiz. Biz kubokda ham, bugun ham g'alaba uchun o'ynadik.

- Ikkinchi bo'limda jamoangiz o'yini kuchayib ketdi. Sir bo'lmasa, tanaffusda futbolchilarga nimalarni aytdingiz?

- Birinchi bo'limda yomon o'ynaganimiz haqida aytdim. O'yinni kuchaytirishimiz va g'alaba haqida o'ylash lozimligini tushuntirdim. Haqiqatdan ham ikkinchi bo'limda o'yinimiz kuchaydi, biroq vaziyatlarni yakunlashda xatoliklarga yo'l qo'ydik.

Jamshid Saidov: "Birgina xato qimmatga tushdi"