O'yin haqida

- Qiyin o'yin o'tkazdik. Muxlislarimizga raxmat, bizga oxirigacha ishonishdi va qo'llab-quvvatlashdi. Birinchi davra yakunini ajoyib g'alaba bilan yakunladik. Yigitlarga xarakter ko'rsatishgani uchun minnatdorchilik bildiraman. Bugungi g'alabada jamoaning har bir azosini alohida mehnati bor. Shuningdek, takidlab o'tish kerak, bugun mahalliy ishqibozlar ham bizga muxlislik qilishdi. Albatta, ularga ham jamoamiz nomidan minnatdorchilik bildiraman.

- Jamoliddin Ubaydullaevning zaxiraga olinishi jarohat bilan bog'liqmi?

- Ha, shunday bo'ldi. U raqib futbolchisi bilan kurashda jarohat oldi, majburiy almashtirishga qo'l urdik. Uning holati haqida barchasi tibbiy ko'rikdan so'ng malum bo'ladi.

- Evropa chempionatida Gruziya terma jamoasi ajoyib o'yinlar ko'rsatayapti. Umuman chempionatimizga keladigan gruzin futbolchilarning imkoniyatlarini qanday baholaysiz?

- Jamoamizga keladigan legioner bizning principlarga mos tushishi kerak. Gruzin futbolchilarda kurashuvchan xarakter bor. Namangandagi o'yindan so'ng bizda jarohatlar bor edi. Gruziya terma jamoasi Evropa chempionatida ajoyib o'yin ko'rsatib, Portugaliyani 2:0 hisobida mag'lub etdi. Umuman, gruzin futbolchilar haqida fikrim ijobiy.

- "Qizilqum" chempionat startini yaxshi boshlagandi. Biroq, keyinchalik natijalarda pasayish ko'zga tashlandi. Bu nima bilan bog'liq?

- Avval ham aytgandim, hozirgi Superligamiz saviya jihatdan anchayin kuchayib ketdi. Hamma jamoa tahlillarga asoslangan futbol o'ynayapti. Kuchsiz ko'rinayotgan jamoaning o'zi yo'q. "Nasaf" yoki "Paxtakor"ni oling, kuchli jamoalar, lekin ular ham har bir o'yinda katta qiyinchiliklarga duch kelishmoqda.

Jamshid Saidov: "Bugun mahalliy ishqibozlar ham bizga muxlislik qilishdi"