- Нима дейиш мумкин. Ўйинни жуда ёмон бошладик. Ҳимоя сочилиб кетди ва 3та голни тез ўтказиб юбордик. 25-дақиқада 3:0 ҳисобида мағлуб бўлаётгандик. Бундай паллада жуда қийин бўлади. Иккинчи бўлимдаги ўйин учун йигитларга раҳмат дейман, курашишди, ўйнашди, гол уришди. Бироқ барчаси биз кутгандек бўлмади.

- Ўйин тақдири биринчи бўлимда ҳал бўлди деб ҳисоблайсизми?
- Ҳа, албатта. Биринчи бўлимнинг ўзидаёқ 3та гол ўтказиб юборгандан кейин қайтиш жуда қийин бўлади. Биринчи бўлимда барчаси ҳал бўлганди. Иккинчи бўлимда "Локо" 10 киши бўлиб қолган бўлса-да, яхши ҳимояланди. Вазиятлар яратдик, бироқ фойдалана олмадик.

- Суперлигада қолиш имкониятларини қандай баҳолайсиз?
- Ҳали ўйинлар бор, охиригача курашамиз. Ҳар бир ўйин биз учун финал каби бўлади, майдонга чиқамиз ва курашишда давом этамиз. Лекин бугун йигитлар учун жуда қаттиқ афсусдаман. Ишлашда, хатоларни тузатишда давом этамиз. Турнир жадвалида юқорига кўтарилиш керак.

- "Бухоро"да олдин яхши шароит бўларди. Ҳозир нима сабабдан бунчалик ёмон бўлиб кетди?
- Бу саволга жавоб бериш оғир. Келганимда жамоа ҳисобида 2 очко бор эди ва сўнгги поғонада кетаётганди. Трансферлар ойнасидан ҳам унумли фойдалана олмадик, ПФЛ олдида бизнинг қарзларимиз бор. Шу боисдан улар янги футболчиларни рўйхатдан ўтказишга рухсат беришмади. Ҳеч қиси йўқ, таркиб ёмон эмас, ёш ва ғайратчан футболчилар астойдил югурмоқда. Менимча барчаси олдинда. Ҳали рақобатчилар билан ўйинлар бор. "Локомотив" биз учун рақобатчи жамоа эмас. Турнир жадвалида бизга яқин бўлиб турган "Андижон", "Сурхон" каби "жон сақлаб қолиш" учун курашаётган жамоаларни кузатиб боряпмиз.

Жамшид Саидов: "Ўйин тақдири биринчи бўлимда ҳал бўлганди"