O'zbekiston Coca Cola Kubogining “A” guruhida o'rin olgan “Turon” – “Andijon” (1:0) o'yinida mezbonlar g'olib bo'lib, keyingi bosqich yo'llanmasini qo'lga kiritdi. Mazkur uchrashuvda yagona golga mualliflik qilgan Jasur Hakimov o'yindan keyin saytimizga intervyu berdi.

- Jasur, avvalo g'alaba bilan tabriklaymiz. Uchrashuv haqida fikrlaringizni bildirib o'tsangiz?

- Tabrik uchun rahmat. O'yin kutilganidek qiyin bo'ldi. Vodiy jamoalari o'rtasidagi kurash doimo keskin va murosasiz tarzda o'tib keladi. “Andijon” ham g'alaba uchun jiddiy kurashdi. Ob-havoning issiqligi ham o'z tasirini o'tkazmasdan qolmadi. Shunga qaramay guruhdan keyingi bosqichga chiqishimiz uchun g'alaba qozonishimiz zarur edi. Shu bois astoydil xarakat qilib, maqsadimizga erishdik. Bundan xursandmiz.

- Uchrashuvdagi yagona golga mualliflik qildingiz. Ko'rsatgan o'yiningizdan ko'nglingiz to'ldimi?

- Bilasizmi shaxsiy natijadan ham ko'ra ko'proq jamoamning muvaffaqiyati men uchun muhim sanaladi. Chunki futbol jamoaviy o'yin. Jamoa yutsa, hamma mukofot oladi. Shuning uchun ham kecha men asosan g'alabani o'ylab, qo'limdan kelganicha jamoamga yordam berdim.

- Bungacha chempionat o'yinlarida sizni asosiy tarkibda kam uchratayotgandik. Bu nima bilan bog'liq?

- Tarkibda mendan tashqari yana ikki nafar tajribali hujumchilar bor. Murabbiylar ayrim omadsiz uchrashuvlardan keyin o'zgarish qilib, hammaga imkoniyat berishni afzal ko'ryapti. Barqarorlikka erisha olmayotganimga eng avvalo o'zim sababchiman. Extimol bilan murabbiyning ko'rsatmasini to'liq bajara olmayotgandirman. Yoki kutilgan o'yinni ko'rsata olmaganim uchun zaxirada qolib ketayotgandirman. Nasib qilsa keyingi bahslarda ham gollarim bilan jamoamga foyda keltirishga xarakat qilaman.

- “Turon” chempionatda haligacha g'alaba qozona olmayapti. Buni qanday izohlagan bo'lardingiz?

- Jamoamiz bu yil Superligada debyut mavsumini o'tkazmoqda. Tarkib yangitdan tuzilgan. Mahoratli o'yinchilar taklif etilgan bo'lsada, bir-birimizni to'liq tushunib o'ynab ketishimiz uchun ozgina vaqt kerak edi. Menimcha o'yindan-o'yinga jamoaviy o'yinimiz yaxshi chiqyapti. O'ylaymanki “Turon” uchun hali hammasi yaxshi bo'ladi.

- Oldindan “Paxtakor”, AGMK va “Qizilqum”ga qarshi o'yinlar kutib turibdi. Bo'lajak uchrashuvlar oldidan jamoangizning imkoniyatini qanday baholaysiz?

- Har uchchala raqibimiz ham jiddiy sanaladi. Ularga qarshi o'ynash oson bo'lmasligi aniq. Lekin oldindan taslim bo'lish niyatimiz yo'q. Maydonga chiqib, muxlislarimizni xursan qilish uchun bor kuchimizni ishga solamiz. Oldindan g'alabaga bo'lgan imkoniyatlar haqida gapirish qiyin. Chunki bu futbol. Unda hamma narsa bo'lishi mumkin. Masalan AGMKning OCHLdagi ishtirokidan kelib chiqib aytadigan bo'lsak, unda biz uchun kutilmagan natijalar yuz berdi.

Jasur Hakimov: “Kubokda guruhdan keyingi bosqichga chiqqanimizdan xursandmiz”