Сречко Катанец нега Бўриев ўрнига ҳимоячи Ҳамралиевни чақиради? Катанец нега Ашурматов ўрнига ярим ҳимоячи Холматовни чақиради? Сабаби мураббий фақат ўз ғояларини сингдира олган, яъни бир неча бор терма жамоа йиғинларига чақирилган футболчилар билан ишлашни яхши кўради. Марказий ҳимоячи Ашурматов ўрнига айтайлик Ғолиб Ғайбуллаев ёки Шаҳзод Азмиддинов чақирилиши мумкин эди, аммо Холматов Катанец ғояларини яхшироқ билади. Мураббий учун бу энг муҳими.

Масалан, бу мавсум фаолиятидаги энг яхши мавсумни ўтказаётган Анвар Ҳожимирзаевни терма жамоага чақирув олишини кутманг. Чунки Катанец у билан бирга ишламаган ва мавсумда 20та гол урса ҳам чақирув олмаса керак деб ўйлайман. Ҳожимирзаевдан кўра, агар терма жамоада кимдир жароҳат олса Азиз Амоновнинг чақирилиши ҳақиқатга яқинроқ. Чунки Катанец Амонов билан бирга ишлаган ва унинг имкониятларини яхши билади. Айнан шу боис терма жамоамиз етакчилари клубсиз бўлганида ҳам доимий равишда терма жамоага чақирув олаверишган.

Бу Катанецни танқид қилиш эмас. Шунчаки ўқувчиларга тушунтириш холос. Шахсан мен учун терма жамоамиз Жаҳон чемпионатига чиқса бўлди, қолгани бекор.

Нарзулла Сайдуллаев

Катанец нега ҳимоячи ўрнига ярим ҳимоячи, ярим ҳимоячи ўрнига эса ҳимоячини чақиради?