Marca nashrining xabariga ko'ra, jamoa hujumchisi Edinson Kavani klubning ECHLdagi yurishi uchun amaldagi shartnomasini ikki oyga uzaytirishni istamadi. Urugvaylik hujumchining shartnomasi 30 iyun kuni nihoyasiga etadi.

RMC Sport nashriga ko'ra, jamoa himoyachisi Toma Mene ham 30 iyun kuni klub bilan amaldagi shartnomasi yakunlanishi hamonoq jamoani tark etadi. Ilgariroq ushbu futbolchi Dortmundning “Borussiya” jamoasiga o'tishi haqida xabar berilgandi.

Shu bilan birga klub rahbariyati “Sevilya” jamoasidan ijaraga olingan darvozabon Serxio Riko bilan kelishuvni 31 avgustga qadar uzaytirishga erishdi. Shuningdek, ushbu sanaga qadar yarim himoyachi Erik Maksim Shupo-Moting va himoyachi Leven Kurzava ham jamoada qoladigan bo'lishdi. Parijliklar Tiago Silva bilan ham shartnomani 31 avgustga qadar uzaytirish borasida muzokara olib borishmoqda va braziliyalik himoyachining avgust oyining so'nggiga qadar jamoada qolish ehtimoli yuqori baholanmoqda.

Kavani va Mene shartnomasini ikki oyga uzaytirishni istashmadi