"Temiryo'lchilar" 9-turda "Andijon" jamoasi ustidan g'alaba qozonishdi. Shundan keyin Maxaradze bilan yubiley uchrashuvi haqida suhbatlashdik.

- Kaxi, avvalo, "Andijon" jamoasi bilan bo'lgan uchrashuvda qo'lga kiritilgan g'alaba haqida fikringizni bildirib o'tsangiz.

- Qiziqarli o'yin bo'ldi. Dastlabki daqiqalarda biroz qiyin bo'ldi. Qolaversa, hisobni mehmonlar ochishdi. Shunga qaramay, irodamizni namoyish etgan holda g'alaba qozonishni uddasidan chiqdik.

- O'yinlar soni bo'yicha "Lokomotiv" tarkibida 150 talik dovondan o'tdingiz. Bu siz uchun nimani anglatadi?

- Albatta, bu mening omadim. "Lokomotiv" jamoasida 150 ta uchrashuvda maydonga tushish men uchun sharaf. Bundan, albatta, xursandman. O'yinlarimni etibordan chetda qoldirishmagani uchun jamoadagilarga rahmat aytaman.

- O'z mamlakatingizda ham mana shunday ko'rsatkich qayd etganmisiz?

- Yo'q, Gruziyadagi faoliyatim buncha davom etmagan. Ammo, "Paxtakor" uchun 160 dan ortiq o'yin o'tkazganman.

- "Lokomotiv" safidagi 150 ta uchrashuv orasida siz uchun esda qolarli o'yinlar qay biri?

- "Temiryo'lchilar" tarkibida g'alaba qozongan o'yinlarimizning barchasi men uchun eng yaxshisi va yodda qolarlisidir.

- O'z oldiga chempionlikni maqsad qilgan "Lokomotiv2 bu mavsumda doim ham barqaror o'yin namoyish etishi qiyin bo'lmoqda. Bu borada nima deysiz?

- Jamoaga yangi murabbiy keldi, tarkibda o'zgarishlar ko'p bo'ldi. Yangi murabbiyning falsafasiga moslashish uchun baribir vaqt kerak bo'ladi. Umid qilamanki, hali hammasi yaxshi bo'ladi.

- O'zbekistonda to'p tepishni boshlaganingizga 10 yildan oshdi. Bu mavsum oxirgisi bo'lmasa kerak?

- Shunday bo'lishiga umid qilaman. O'zbekistonda "Lokomotiv", "Paxtakor" va "So'g'diyona" jamoalarida o'ynadim. Hali ketish haqida o'ylamayapman.

Kaxi Maxaradze: "O'zbekistondan hali ketmayman"