- Uzoq tanaffusdan so'ng yana "Loko"ga qaytdingiz...

- "Lokomotiv" yuksak maqsadlarni o'z oldiga qo'yadigan kuchli jamoa. Bu erga yangi maqsad va niyatlar bilan keldim. "Temiryo'lchilar" safiga o'tganimdan juda xursandman. Bu jamoada kuchli, mahoratli futbolchilar, ijrochilar yig'ilishgan. Men "Loko"ga ko'zlangan maqsadlarga etishishi uchun yordam berishga keldim. Men uchun "Loko"ga o'tish qiziqarli tuyuldi.

- Sizni "Lokomotiv"ga o'tishingizga nima to'rtki bo'ldi?

- Aynan nimadir to'rtki bo'lib bu erga o'tdim deya olmayman. "Paxtakor" jamoasi uchun beradigan narsamni berib bo'ldim deb o'ylayman. "Sherlar" safida ko'plab yutuqlarni qo'lga kiritdim. "Paxtakor" bilan uch marta O'zbekiston chempionligi va O'zbekiston kubogini yutishga ulgurdim. Bu erdagi missiyam nihoyasiga etdi deb o'ylayman. "Paxtakor" jamoasi hamisha qalbimda, yuragimda qoladi. "Paxtakor" - bu "Paxtakor". U erda men juda ko'plab ajoyib damlar, unutilmas lahzalarni boshdan kechirdim. Buning uchun klubdagi barchaga katta rahmat aytaman va minnatdorchilik bildiraman. "Paxtakor" muxlislariga esa alohida tashakkur! Ularga ham katta rahmat aytaman. "Paxtakor" bu xalq jamoasi. Bu klubni barcha birdek sevadi, hurmat qiladi. Bu jamoani unutishning hech ham iloji yo'q.

- "Lokomotiv" uchinchi yildirki chempionlikni maqsad qilib kurashib kelmoqda. Lekin bu jamoa hali ham o'z maqsadiga erisha olganicha yo'q. Kaxi Maxaradze jamoaning ushbu muammosini echimi bo'la oladimi?

- Men kelib jamoani tezda chempion qilaman deya olmayman. Qo'limdan kelganicha "Lokomotiv"ning muvaffaqiyati uchun yordam beraman va jamoaga foydam tegishi uchun jonimni beraman. O'ylaymanki, biz jamoa bilan o'z oldimizga qo'yilgan vazifalarni alo darajada uddalaymiz.

Shahboz Beg'amov suhbatlashdi.

Kaxi Maxaradze: "Paxtakor" hamisha qalbimda, yuragimda qoladi"