O'zbekistonlik yarim himoyachi Sanjar Shoahmedov to'p tepayotgan "Terrenganu" klubi "Sabax"ni 4:0 hisobida mag'lub etdi. Quvonarlisi hamyurtimiz ikkita gol urib dublga erishdi. Biz Shoahmedov bilan aloqaga chiqib taassurotlari bilan qiziqdik.

"Kecha restartdan keyingi birinchi o'yinimizni o'tkazdik. Malayziyaning yaxshi saviyadagi bo'lmish "Sabax" jamoasiga qarshi uchrashuvda ishtirok etib muhim g'alabani qo'lga kiritdik. Uchrashuv uy stadionimizda bo'lib o'tdi. Yirik 4:0 hisobidagi g'alaba qozongan o'yinda ikkita gol urdim. Men uchun muhimi jamoam g'alabasi, gollarni jamoamga foydam tegishi uchun urdim. Taassurotlar yaxshi, turnir jadvalida ikkinchi o'rinda ketmoqdamiz. Chempionat hali tugmadi. Oldinda hali yana oltita o'yin bor. Barchasi mavsum yakunlangach hal bo'ladi. Shu bois xulosa qilishga erta deb o'ylayman.

Ha, 15 martdan so'ng chempionat bahslari malum muddatga to'xtatilgan edi. Ko'ryapsiz hamma joyda koronavirus sabab karantin elon qilindi. Malayziyada ham to'rt oydan oshiq futbol to'xtab qoldi. Garchi kechadan rasmiy o'yinlarga ruhsat berilgan bo'lsa bunga qadar biz 7-8ta o'rtoqlik uchrashuvlarida ishtirok etdik. Ikki oy davomida mashg'ulotlar olib borildi, tayyorgarlik ishlari davom ettirildi. Jamoadagi futbolchilar sekin-asta sport formasiga qaytmoqda. Jismoniy holati, texnikasi, tezligi tiklanmoqda.

Malayziyada ayni paytda vaziyat ancha yaxshi. Jamoalar ikki oydan beri mashg'ulotlarni olib bordi, bu jarayon davom etmoqda. Tartib qoidalar hamma qatori, sanitariya-gigiena talablariga etibor bergan holda o'yinlar o'tkazilmoqda.

Albatta, O'zbekiston chempionatini har bir uchrashuvlarini kuzatib boraman, natijalar bilan tanishib chiqaman. Qo'ldan kelgancha ijtimoiy tarmoqlar orqali o'yinlarni ko'rib borishga harakat qilaman. Superligaga befarq emasman. Sobiq jamoam "Lokomotiv"ni ham natijalaridan xabardorman. Oxirgi bir nechta turlarda ketma-ket mag'lubiyatlarga uchrashayotgani nima bilan bog'liqligini bilmayman. Hammasi o'tib ketadi degan umiddaman. Birinchi davra tugadi, oraliqdagi tanaffus foydaga ishlashi mumkin. Mashg'ulotlarda yaxshi ishlab, kerakli transferlarni amalga oshirib jamoani kuchaytirishadi. Endi bularni klub rahbarlari, murabbiylar hal qiladi.

O'zbekistonlik muxlislarga sog'lik va salomatlik tilab qolaman",- deydi Sanjar Shoahmedov.

Abdulaziz Iskandarov yozib oldi.

Kecha dublga erishgan Sanjar Shoahmedov bilan suhbat