Demak, voqealar rivoji haqida bir boshidan to'xtalib o'tamiz:

48-daqiqa: To'p tunislik futbolchi Sxirining qo'liga tekkanidan so'ng penalti berildi. Mali hisobni ochdi.
76-daqiqa: To'p qo'lga tekkani tufayli VAR orqali navbatdagi 11 metrlik belgilandi. Bu safar Tunis foydasiga.
77-daqiqa: Mali darvozaboni Ibraim Munokoro Vaxbi Xazrining zarbasini qaytarishga erishdi. Hisob o'zgarmasdan qoldi – 0:1.
85-daqiqa: Referi Janni Sikazve o'yin nihoyasiga etganini bildiruvchi hushtakni chaldi, ammo tunisliklarning etirozlaridan keyin bahs qayta tiklandi. Bu paytga kelib stadionning hech qaerida vaqt ko'rsatib turadigan moslama mavjud emasdi.
87-daqiqa: Mali o'yinchisi Al Bilol Ture to'g'ridan to'g'ri maydondan chetlatildi. VAR Sikazvedan vaziyatni yana bir bor ko'rib chiqishni so'radi, biroq qahramonimiz o'z fikrida qoldi va qaror o'zgarmadi.
89-daqiqa: Sikazve tomonidan yana bir bor o'yin tugagani haqida hushtak yangradi (qanotda to'rtinchi hakam qo'shimcha vaqtni namoyish etishga shay holatda, uning tablosida 4 raqami yonib turibdi, sekundomerda esa vaqt 89:49 ni ko'rsatmoqda). Dahshat!

Shundan so'ng maydonda talato'p boshlandi. Tunis shokda – futbolchilar va terma xodimlari yana hakamning qaroriga keskin qarshilik ko'rsatishdi. Murabbiy Mondxer Kabeyerning shaxsan o'zi Sikazve bilan gaplashishga oshiqib, o'z soatini namoyish qildi, ammo hakam bunga quloq tutmadi va jamoalarni dam olishga, maydonni tark etishga chaqirdi.

Tartibni saqlash uchun styuardlar xizmatiga murojaat etildi

Bu orada Mali ustozi Muhammad Magassuba matbuot anjumaniga yo'l oldi, biroq murabbiydan maydonga qaytishini so'rashdi. Uzoq davom etgan uchrashuvni tugatib qo'yishga kelishildi, uning shogirdlarini ham maydonda kutishdi.

Maliliklar chiqishdi, lekin raqiblari iltimosni qabul qilishmadi. Tunis futbolchilari bundan shunchaki bosh tortishdi (oradan chamasi 40 daqiqa o'tib ketgandi).

"Sportga xos bo'lmagan jarayonni nazoratga olish qiyin. 85-daqiqada u final hushtagini chaldi. 89-daqiqada ham shu holat ro'y berdi. Aslida 7-8 daqiqa qo'shib berilishi taxmin qilingandi. Uning qarori mutlaqo tushunarsiz bo'ldi. O'yinchilarim allaqachon, 35 daqiqadan beri muzli hammom qabul qilayotgandi – keyin ularni yana maydonga tushishga chorlashdi. Shuncha yildan buyon murabbiylik qilaman, biroq ilgari bunaqasiga duch kelmaganman va hali ham hech narsani tushunmayapman. To'rtinchi hakam tabloni ko'tarish arafasida edi, ammo ungacha o'yin tugagani haqida hushtak chalindi. Barchamiz bundan shokka tushdik", – deya hayratini yashirmadi Kebayer.

Xullas, Tunis maydonda paydo bo'lmadi. Shu tariqa, qishning eng shov-shuvli bahsida Mali g'alaba qozondi (1:0).

"Men futbolchilarga faqat maydondagi vaziyatlarni boshqara olishimiz mumkinligini, maydon tashqarisidagi holatlarning barchasi mamurlarga bog'liqligini takidladim. Bizni maydonga qaytarib, o'ynashimizni aytishganida, bunga tayyor edik. Afsuski, raqiblarimiz chiqishni xohlashmadi", – dedi Magassuba.

Tunis – Mali 0:1
Limbé Omnisport Stadium
Gol: 0:1 – 48, penalti Kone.
Tunis – Ben-Said, Matluti, Ifa (Jaziri, 81), Bronn, Talbi, Maalul, Sxiri, Laiduni (Sliman, 67), Sliti (Tuzgar, 79), Mejbri (Kaui, 46), Xazri.
Mali – Munkoro, Traore, Sako, Kuyate, Aydara, Traore (Bissuma, 59), Samasseku, Aydara (Kulibali, 81), Jenepo (Ture, 81), Traore (Dumbiya, 73), Kone (Kulibali, 73).
Ogohlantirishlar: Traore (18), Matluti (22), Jenepo (33), Sxiri (47).
Chetlatish: Ture (87).

Endilikda o'yinni muddatidan oldin yakunlagan bosh hakamning qilig'idan g'azablanib, maydonga chiqishdan bosh tortgan Tunisni jazo kutmoqda.

Afrika kubogi - o'zgacha musobaqa. Ishtirokchilar orasida Evropa top-chempionatlarida to'p tepadigan yulduzlar ko'p. Biroq musobaqa o'yin tashkilotchiligi bobida maqtana olmaydi, etibor shu kabi "qovun tushirishlar" evaziga jalb qilinadi.

Kechagi kun tomoshasi... Tunis – Mali uchrashuvida nima(lar) ro'y berdi?