Ammo tez orada ikkilana boshlaysiz. Quyidagi suratga etibor qarating.

Bu yigitcha roppa-rosa 21 yil oldin Andijonda tug'ilgan. Uning ota-onasi o'qimishli odam bo'lishini istashardi. Shu tufayli farzandlarini bazi fanlar chuqurlashtirib o'qitiladigan, ixtisoslashtirilgan maktabga berishdi. 6 yillik tahsildan keyin ilm-fanni bizga qoldirib, to'pchi bo'lishni tanlagan bolakay ayni paytda "Olimpik" klubi va O'zbekiston olimpiya terma jamoasi sharafini himoya qilyapti. Bugun tug'ilgan kunini nishonlayotgan Dostonbek Tursunov bilan kichik suhbat uyushtirdik.

- Doston, qanday qilib "Olimpik" jamoasiga kelib qoldingiz?

- Men Baliqchi tumanida tug'ilganman. Futbolga boshqa tengdoshlarimga nisbatan ancha kech kirib keldim. 7-sinfga o'tayotgan paytimda Andijondagi futbol liceyiga qabul qilindim. Birinchi murabbiyim Yodgor aka Xurxonov Toshkentdagi musobaqaga olib kelgani esimda. U erda "Paxtakor"ning 2001 yilda tug'ilgan tarbiyalanuvchilarini shug'ullantiradigan Stanislav Petrovich ko'rikka kelishimni aytgan. 1 haftalik sinovdan keyin "sherlar" tarkibiga qabul qilindim. Shu, ulg'aygandan keyin o'rinbosarlar jamoasida o'ynadim. 2021 yilning boshida esa Timur aka "Olimpik" tarkibiga jalb qildilar.

- Timur Kapadzening boshqa murabbiylardan ajralib turadigan 3 xislatini ayting.

- 1. O'yindan oldin har bir raqibni chuqur o'rganib, to'g'ri taktika tanlay oladi. 2. Futbol falsafasi juda kuchli, bu nazariy darslarimizda yaqqol bilinadi. 3. Eng mayda detallargacha etibor qilib, bizga nafaqat maydonda ustozlik qiladi. Balki uyda va ko'chada qanday yurish kerakligini ham o'rgatadi. Ehtimoliy xatolarimizning oldini olishga harakat qiladi.

- Nima deb o'ylaysiz, "Olimpik" loyihasi tug'ilmasa, bugun qaysi jamoa safida bo'lardingiz?

- Bu haqda o'ylab ko'rmagandim. 2021 yilning avvalida "Paxtakor" Pro ligaga jamoa qo'ymoqchi edi. O'shanda shug'ullanib turgandim. Keyin Timur akadan taklif keldi.

- 2021 yilgi o'yiningizdan ko'nglingiz to'ldimi?

- Yo'q, chunki yana ham o'sishim kerak edi. O'zimdan qoniqish hosil qilgan kunim o'sishdan to'xtab qolaman.

- "Sho'rtan" darvozasiga super gol kiritgan edingiz. O'sha bahs o'tgan mavsumdagi eng yaxshi o'yiningiz bo'ldimi?

- Menimcha, shunday. Lekin alam qiladigan tomoni ham bor. "Jar" stadionida o'tgan aynan o'sha o'yin translyaciya qilinmagani tufayli golni bugun tomosha qilolmaymiz.

- U-23 jamoamiz Parij Olimpiadasiga yo'llanma olsa, 2024 yilda kim etakchi bo'ladi?

- Bu borada aynan bir futbolchini ajratib ko'rsatolmayman. Chunki murabbiyimiz faqat jamoaviy o'yinga etibor qaratyapti va shu orqali muvaffaqiyatga erishmoqchi.

- Muxlislarda barcha futbolchilar katta maosh oladi va boy bo'ladi, degan qarash mavjud. "Olimpik" ham o'yinchilarga katta pul to'laydimi?

- Yo'q, unday emas. Bu jamoaga pul uchun emas, faqat o'sish uchun kelganmiz. To'lanayotgan pul o'zimizga etadi. Afsuski, sizga uning miqdorini aytolmayman. Shartnomamda bu taqiqlangan. Lekin bizda barcha o'yinchilarga bir xil oylik oladi.

- Doston, futboldagi eng katta maqsadingiz nima?

- Maqsadlar ko'p: Olimpiadada medal yutish, mundialga chiqish va Evropada o'ynash.

- Doston Tursunovning kamchiliklari haqida gapiring.

- Jismoniy holatimda muammo bor. Ammo har kun shu kamchilikni bartaraf qilish uchun harakat qilyapman. O'zbekiston chempionatida bu muhim rol o'ynaydi.

- Suhbat uchun tashakkur. Tug'ilgan kunni yaxshi o'tkazing.

- Etibor uchun sizga ham rahmat. Iloji bo'lsa, futboldagi dastlabki ustozlarim Yodgor aka Xurxonov va Stanislav Petrovichga minnatdorchilik bildirmoqchiman.

Qadrli muxlis, ushbu futbolchini eslab qoling. Yaqin yillarda terma jamoamizning mudofaa qo'rg'onidagi Doston Tursunovlar soni 2 taga etishi mumkin. Ularning kichigini yana bir bor tavallud kuni bilan tabriklab, "Manchester Yunayted"da to'p tepishini tilab qolamiz.

Kichik Doston Tursunovni taniysizmi?