The Times нашри ПСЖ клуби берган хабарга таянган ҳолда, футболчи 2021 йил ёзда клубдан кетмоқчи эканини (шартнома муддати 30 июнь 2022 йилгача) маълум қилди. Мбаппенинг бундай кутилмаган қарори иқтисодий масалалар билан боғлиқ эмас, унинг маоши ошган нарх бўйича йилига 20 млн еврони ташкил этмоқда. ПСЖдан кетиш истаги шахсий ва профессионал сабаблар билан боғлиқ. Қуйида франциялик футболчи клубдан кетиши учун 5 сабабни келтириб ўтамиз.

"Реал": Зинедин Зидандан ҳайратланиш

Килиан болалигидан Зинедин Зиданга ҳавас қилиб келган. Франция терма жамоаси Жаҳон Чемпионати-1998да ғалаба қозонганидан 5 ой ўтиб, Мбаппе таваллуд топган. Ўша ўйинда Франция жамоаси Рональдо ва Роберто Карлосдек ўйинчиси бўлган Бразилияни Зиданнинг дубли (3-0) эвазига мағлуб этганди. Килианнинг отаси Зиданни ўз кумири деб ҳисобларди, шунинг учун Килиан болалигидан у билан танишишни орзу қиларди. Мбаппе ҳали болалик давридаёқ хайрия учрашувидан сўнг у билан суратга тушишга муваффақ бўлган, 14 ёшида эса деярли "Реал Мадрид"га ўтган ва Вальдебебас машғулот базасига борган ҳамда яна бир кумири Криштиану Роналду билан учрашган. Ёдингизда бўлса, аввал ҳам қаҳрамонимиз хонасида "Мадрид"нинг икки афсонаси билан тушган суратлари деворда осилиб тургани ҳақида мақола чоп этган эдик.

Чемпионлар Лигасида зафар қучиш истаги

Мбаппе "Монако"да ўйнаб юрган вақтларда (2017) Чемпионлар Лигаси ярим финалигача чиққан. Ўша пайт у 18 ёш бўлишига қарамай, клуб муваффақиятга эришишида унинг ўйини муҳим омиллардан бири бўлган. Шундан сўнг, Мбаппега "Мадрид" ва ПСЖ эътибор қарата бошлади, лекин у билан шартнома имзолаш бахти француз клубига насиб этди. Килиан ПСЖ билан ЕЧЛнинг уч мавсумида иштирок этган ва охирги уринишда финалгача етиб борди, бироқ бош совринни қўлга киритиш ҳали насиб этгани йўқ.

Франция клуби Лиссабонда ўз орзусига эришишга яқин турганди, аммо "Бавария" ундан кучлироқ чиқди. Мбаппе узоқ кутолмайди, ҳеч кимга сир эмас, "Реал Мадрид" — ушбу турнирнинг қироли ҳисобланади (13 та ғалаба). Килиан ҳам буни жуда яхши билади. Мақсадига эришиш учун "Реал" идеал вариант.

"Олтин тўп"

Кўпчиликка маълум, агар ким Чемпионлар Лигасида ғалаба қозонса, "Олтин тўп"ни қўлга киритиш имконияти кескин ортади. ПСЖнинг Европадаги муваффақиятсизликлари Мбаппега салбий таъсир кўрсатди, Франция термаси билан ЖЧ-2018да ғалаба қозонганига қарамай, у машҳур индивидуал совринга яқин ҳам келолмади. "Мадрид"да кўплаб "Олтин тўп" соҳиблари ўйнаган: Зидан, Роналдо, Фигу, Криштиану (Қироллик клубида 4 марта мукофотга эга чиққан), Модрич.

Килианнинг фикрича, "Реал Мадрид" футболга ҳам, ОАВга ҳам катта таъсир кўрсатади ва у истаган "France Football" томонидан бериладиган совринни қўлга киритишида ёрдам бера олади. "Ливерпуль" собиқ ўйинчиси ва Африкада "йилнинг энг яхши ўйинчиси" тоифасида икки карра "Олтин тўп" соҳиби Эль-Хаджи Диуф шундай деган эди: "Агар Килиан "Олтин тўп" ютишни истаса, Франциядан кетиши лозим".

Янги "Бернабеу"

Мбаппе "Мадрид" ҳамда 2022 йил қуриб битказиладиган энг замонавий "Сантьяго Бернабеу" стадионидаги катта ислоҳотларни ҳам яхши билади. Килиан лойиҳани кўрган ва қанчалик катта ҳажмдаги иш қилинаётгани унга маълум. Янгиланиш фақатгина стадион билан амалга ошмайди, раҳбарият бир нечта ТОП футболчини ҳам кўзлаб юрибди. Мбаппенинг ўзи ҳам янги ва замонавий "Беранабеу"да ўйнаш унга катта мотивация беришини тан олганди. Агар ҳаммаси режадагидек бўлса, трибуналар мухлислар билан тўлиши аниқ.

Французча "Мадрид"

"Жамоада Зидан ва унинг ёрдамчилари ҳам франциялик бўлишидан ташқари, Килиан кийиниш хонасида ҳам Варан, Бензема ва Менди, балки яна Камавинга ва Упамекано билан елкама-елка бўлиши мумкин. "Мадрид"да французлар етарлича топилади, бу эса Килианнинг клубга мослашишини осонлаштиради. "Қироллик клубидагилар" Мбаппе жамоани тарк этган Криштиану Роналдунинг ўринбосари бўла олиши ва яқин 5-10 йилга асосий юлдузлардан бирига айланишига ишонадилар. Мбаппе бу чорловга тайёр эканлигини билдирмоқчи. Яна бир йил кутсак бўлди.

Нозима Зарипова таржимаси

Килиан Мбаппе "Реал Мадрид"га ўтиши учун беш сабаб