Мана яқинда Осиё Кубоги-2019га қуръа ташланди ва Мансур ва Жарроҳ мусобақанинг расмий тимсол сифатида таништирилди. Ҳар иккала "маскот" Осиё чемпионати ўйинлари пайтида стадионда юриб мухлислар билан расмга тушади ҳамда футболчиларни олға ундаб туришади. Мансур бу - миллионлаб болакайларнинг ёқимтойи, у одамларга доим яхшилик улашади. Жарроҳ эса лочин бўлиб, унинг расми БАА гербида тасвирланган. Ташкилотчилар Осиё футболи юлдузларига қиёсан иккинчи "маскот" сифатида Жарроҳни танлашди.

"Маскотлар" Европа клубларида талайгина. Кимдадир ҳайвон, кимдадир қуш. Бу асосан клубларнинг лақабидан келиб чиқиб танланади. Ўзимизнинг жамоаларда ҳам клуб тимсоли бор. Масалан, "Пахтакор"нинг уй учрашувларида "шер", "Бунёдкор" ўйинларида "қалдирғоч", АГМК иштирокидаги баҳсларда эса "қоплон"га кўзимиз тушиб қолади.

Шу боис ҳам "шерлар", "қалдирғочлар", "лочинлар" деймиз. Про-лигадаги "Шўртан" жамоаси ўйинларида "оқ бўри"ни ҳам кўрганмиз. Аммо Суперлиганинг барча клубларида ҳам ўз "маскоти" бўлмаса керак.

Жамоаларнинг ўз "маскоти" бўлгани яхшими? Албатта, яхши. Чунки стадионга келувчи ёш болакайлар у билан расмга тушгиси келади. Қолаверса, "маскот" ўйин бошлангач ўз жамоасини олға ундаб туради.

Бизда кўп жамоаларнинг лақаби бор. Суперлига клублари мисолида оладиган бўлсак, "Пахтакор" - "шерлар", "Бунёдкор" - "қалдирғочлар", "Локомотив" - "темирйўлчилар", "Насаф" - "аждарлар", "Сўғдиёна" - "бўрилар", "Навбаҳор" - "лочинлар", "Нефтчи" - "чинорлар". Бу жамоалар ўз лақабларидан келиб чиқиб "маскот" ясашлари мумкин, лекин масалан "Локомотив" билан "Нефтчи" кимни (нимани) ясайди, ҳайронмиз. Айтайлик, машинистни ясаса бўлар, лекин дарахтни-чи?

Бошқа клублар ҳозирча ўз лақаби ёки "маскоти"га эга эмас. Мисол учун "Бухоро", "Металлург", "Қўқон-1912" ва "Қизилқум". Тўғри, "Қизилқум" уйда ўйнаганда охирги пайтларда "Чип ва Дейл" олмахонлари кўриниб қолди. Бундан келиб чиқиб "Қизилқум"ни "бурундуқлар" деса қалай бўларкин?

Бу кетишда тез орада Суперлиганинг ҳамма клуби ўз тимсолига эга бўлса ажаб эмас.

Клубларимиз ўз "маскоти"га эгами?