Яқинда "ЎФА янада ёрқин фаолият олиб бориши учун Осиёдаги қайси ассоциациядан ўрнак олиши керак?" саволи билан сўров қўйгандик. Бунда 8та мамлакат футбол ассоциациясини мисол сифатида келтиргандик: Япония, Жанубий Корея, Австралия, Хитой, Қатар, Саудия Арабистони, Эрон ва БАА.

Сўровнома натижаларига кўра, энг кўп овозни (35 фоиз) Япония ФА тўплади. Жанубий Корея варианти 16 фоиз овоз тўплаган бўлса, берилган вариантлар орасидаги "Ҳаммасидан ўрнак олса арзийди" деган жавоб ҳам 16 фоиз йиғди.

Шунингдек, Қатар ФАга 13 фоиз иштирокчи овоз берган. Сўровномада қатнашганларнинг 10 фоизи "Ўрнак олиши шарт эмас, бизнинг ўз йўлимиз бор" деган вариантда қолган. Кейинги ўринларни Эрон 4, Австралия билан Саудия Арабистони 2 ҳамда Хитой ва БАА бир фоиздан овоз тўплаб банд этишди.

Сўровномада 10 мингдан зиёд ўқувчимиз иштирок этди. Кўпчилик Япония вариантини танлагани тушунарли. Негаки японларда футбол структураси, профессионал тарзда иш олиб бориш жуда яхши йўлга қўйилган. Шунинг учун бўлса керак, ОФК ҳам ўз тадбирларида Япония футбол ассоциациясини тез-тез эътироф этиб келади. Бундан ташқари уларнинг мунтазам жаҳон чемпионатига чиқиши, Осиё чемпионатлари финалларида иштироки ҳамда клубларининг ОЧЛдаги муваффақиятлари ҳам бежизга эмас.

Кўпчилик ЎФА Япониядан ўрнак олиши керак деб ҳисоблаяпти (сўровнома якунлари)