FIFA kunida o'rtoqlik uchrashuvlari, rasmiy o'yinlarni o'tkazadigan terma jamoalar allaqachon yig'inga jalb etiladigan futbolchilar ro'yxatini elon qilishgan.

2 iyun kuni O'zbekiston terma jamoasining raqibi bo'ladigan Turkiya ham yig'inga jalb etilgan futbolchilar nomini oshkor qildi.

Bilasiz, bo'lajak FIFA (3-11 iyun) kunlaridagi yig'in doirasida biz avvaliga Alaniyada Turkiya bilan, keyinchalik Toshkentda KXDR va Suriyaga qarshi o'rtoqlik uchrashuvlarini o'tkazamiz.

Bizga malum bo'lishicha, mazkur yig'inga Ektor Kuper terma jamoaning kengaytirilgan tarkibiga bazi futbolchilarni qo'shgan. Ular orasida oxirgi turlarda OCHL doirasidagi uchrashuvlarda raqiblar darvozasini nishonga olgan Igor Sergeev va Temurxo'ja Abduxoliqov ham bor.

Shuningdek, O'zbekiston terma jamoasining kengaytirilgan tarkibiga "Paxtakor"dan 10, "Lokomotiv"dan 7 nafar futbolchi jalb etilgan.

Terma jamoaning kengaytirilgan ro'yxatidan joy olgan bazi futbolchilar: Eldorbek Suyunov, Sanjar Quvvatov, Egor Krimec, Farruh Sayfiev, Xojiakbar Alijonov, Odil Hamrobekov, Jaloliddin Masharipov, Dostonbek Hamdamov, Marat Bikmaev, Igor Sergeev (barchasi - "Paxtakor"), Javohir Ilyosov, Islom To'xtaxo'jaev, Anzur Ismoilov, Davron Hoshimov, Oleg Zoteev, Sardor Mirzaev, Temurxo'ja Abduxoliqov (barchasi - "Lokomotiv"), Botirali Ergashev ("Dinamo").

Eslatib o'tamiz, terma jamoadan chaqiruv olgan Dostonbek Hamdamov OCHL doirasidagi "Al Ahli"ga qarshi bahsda olgan jarohati tufayli yig'inda ishtirok etolmaydi.

Qayd etish kerakki, Superligada qatorasiga 5 uchrashuvdan buyon gol urayotgan "Nasaf" hujumchisi Humoyun Murtazoev hozircha terma jamoadan taklif olgani yo'q.

Yakuniy to'liq tarkibni O'FA matbuot xizmati tez orada elon qilishi kutilmoqda.

Kuper OCHLda ketma-ket gol urgan Abduxoliqov va Sergeevni yig'inga jalb etadi