"Реал" дарвозабони Тибо Куртуа жамоанинг Саудия Арабистонининг "Ал Ҳилол" клубига қарши Клублар ўртасидаги ЖЧдаги илк учрашуви ҳақида фикр билдирди. Учрашув 1:1 ҳисобида якунланди ва қўшиб берилган вақтда Федерико Вальверде пенальтини голга айлантира олмади.

"Биринчи бўлимда жуда секин ўйнадик ва ўз ритмимизни топишда қийналдик, улар эса яхшироқ ҳаракат қилишди. Биз гол уришга муваффақ бўлдик, аммо улар пенальти орқали ҳисобни тенглаштирди. Ўйлайманки, иккинчи бўлимда яхшироқ тўп тепдик. Агар худди шу руҳда давом этсак, бир нечта учрашувларда ғалаба қозонамиз", – деди Куртуа.

ФИФА Клублар ўртасидаги Жаҳон чемпионати 2025 йилнинг 15 июнидан 13 июлига қадар АҚШда бўлиб ўтади. Турнирда саккиз гуруҳга бўлинган ҳолда 32 та жамоа иштирок этмоқда. Ҳар бир тўртликдан иккита энг кучли жамоа плей-офф босқичига йўл олади.

"Реал"нинг кейинги ўйини 22 июнь куни "Пачука"га қарши кечади.

Куртуа "Ал Ҳилол" билан дуранг бўйича тушунтириш берди