Ushbu turda bizni ikkita markaziy uchrashuv kutib turibdi:

"Atletiko" - "Betis"

LaLiga chempionligi uchun kurashayotgan Diego Simeone jamoasi joriy mavsum ancha yaxshi natijalarga erishib, chiroyli o'yin ko'rsatayotgan "Betis"ni qabul qiladi. Sevilya shahri jamoasi LaLiga doirasida mehmondagi o'yinlarda hali mag'lub bo'lgani yo'q. Joriy mavsum ularni taslim eta olgan yagona jamoa "Levante". "Betis"ning bu omadsizligi 1-turda yuz bergan, ammo hozir Kike Seten jamoasi formaga kirib olgan va har qanday gigant bilan tengma-teng kurashishi mumkin.

"Atletiko" uyida o'tkazgan o'yinlarida (LaLiga) bor-yo'g'i 1ta gol o'tkazib yubordi. Mehmondagi bahslarda esa ahvol chatoq. Urilgan va o'tkazib yuborilgan gollar teng (3-3). Chempionlar ligasi guruh bosqichining 2-turida "Bryugge" ustidan ishonchli g'alabaga erishgan "matraschilar" asta-sekinlik bilan o'z o'yinini kuchaytirib bormoqda. "Real"ga qarshi bahsni hisobga olmaganda, "Atletiko" so'nggi 4ta o'yinda (barcha turnirlarda) 10ta gol urdi.

"Valensiya" - "Barselona"

"Valensiya" hamda "Barselona" o'rtasidagi uchrashuv turning eng ko'p tomoshabin yig'adigan o'yini bo'lishi kerak. Omadsizliklarga yakun yasab, muvaffaqiyat sari intilayotgan Ruben Uria jamoasi so'nggi ikki bahsda "Real Sosedad"ni mag'lub etdi, Chempionlar ligasi doirasida "Manchester Yunayted" bilan durang o'ynadi. To'g'ri, MYU hozir o'zining eng kuchli o'yinini ko'rsata olmayapti, ammo bu umuman boshqa mavzu.

"Barselona"ni oktyabrda kuchli jamoalarga qarshi bahslar kutib turibdi. Ernesto Valverde jamoasi ushbu oyning birinchi o'yinida "Tottenxem"ni "Uembli"da taslim etishdi. Jamoada kayfiyat ko'tarinki. LaLiga doirasidagi so'nggi 3ta o'yinda g'alaba qozona olmagan Kataloniya klubi ushbu seriyaga chek qo'yish niyatida. Jamoa himoyachisi Samuel Yumtiti norasmiy malumotlarga ko'ra bir necha oy maydonga tusha olmaydi. Uning o'rnini egallab turgan Kleman Langlening o'yini esa hozircha muxlislarni xursand qilayotgani yo'q. "Shpor"larga qarshi kechgan bahsda 4ta gol urgan ko'k-anorranglilar 2ta gol o'tkazib yuborishdi.

7-turda bizni kutib turgan bahslar

5 oktyabr

23:59. "Atletik" - "Real Sosedad"

6 oktyabr

16:00. "Jirona" - "Eybar"

19:15. "Xetafe" - "Levante"

21:30. "Alaves" - "Real"

23:45. "Leganes" - "Rayo Valekano"

7 oktyabr

15:00. "Valyadolid" - "Ueska"

19:15. "Atletiko" - "Betis"

21:30. "Espanol" - "Vilyarreal"

21:30. "Sevilya" - "Selta"

23:45. "Valensiya" - "Barselona"

LaLiga to'purarlari

Andre Silva ("Sevilya") - 7ta gol

Kristian Stuani ("Jirona") - 6

Yago Aspas ("Selta") - 5

Lionel Messi ("Barselona") - 5

Vissam Ben Yedder ("Sevilya") - 4

Karim Benzema ("Real") - 4

Maksimiliano Gomes ("Selta") - 4

Rojer Marti ("Levante") - 4

LaLiga. 8-turga atalgan prevyu