«Торпедо»га қарши кечган учрашув мухлисларсиз ўтди ва ҳарбийлар 3:0 ҳисобида зафар қучишди. Ана шу баҳсдан сўнг ЦСКА бош мураббийи Леонид Слуцкий Championat.com сайтига интервью берди.

- Ўз клубингиз қурган янги майдонда ўйнаш қандай кечди?

- Янги стадионда бўлиб ўтган учрашувнинг ҳар бир дақиқасидан роҳатландик. Бу ўйинни ўтказишимиз муҳим эди. Чунки терма жамоалар ўйинлари муносабати билан кўплаб футболчиларимиз ўйин амалиётисиз қолишганди. Масалан, Вернблум ва Игнашевичлар терма жамоаларидаги фаолиятларини якунлашган.

- Стадионни лойиҳалашда сиздан ҳам маслаҳатлар сўрашдими?

- Айрим жиҳатлар - мураббийлар ўриндиғи, кийиниш хонаси борасида тавсия олишди. Яъни, фақат ўз фаолиятим билан боғлиқ нарсалар бўйича. Бундан бошқа ёрдам ҳам бера олмасдим.

- «Арена ЦСКА»га биринчи бор ташриф буюрганингизда ўзингизни қандай ҳис қилдингиз?

- Янги стадионга келганда, ўзингизни худди янги уйдагидек ҳис қиласиз. Ҳамма бурчакларни ўрганиб чиқасиз. Ажойиб ҳиссиётлар оғушида қоласиз.

- «Арена ЦСКА»ни сиз ташриф буюрган стадионлардан бирортасига солиштириб бўладими?

- Бирортасига ўхшамайди. Усул инглизча. Тўғри бурчакли форма, трибуна майдонга яқин. Бизнинг стадионда ўзига хос жиҳатлар ҳам бор.

- «Торпедо»га гол урган Гордишенкони янги стадиондаги биринчи гол соҳиби, деб ҳисобласа бўладими?

- Унда машғулотлар пайтида киритган тўпларимизни ҳам ҳисоблаш керак. Умуман олганда, расмий ўйинда урилган гол биринчиси ҳисобланади. Умид қиламанки, сиз айтган футболчи «Терек» билан бўладиган ўйинда тўп киритади.

- «Терек» билан бўладиган учрашувда, мухлислар билан тўлган стадионда жамоа ўзини йўқотиб қўймайдими?

- Жамоамиз анча тажрибали ва эҳтиросларини жиловлай олади. Биз олдинлари ҳам Европанинг топ-клубларига қарашли мухлислар билан тўлган стадионларда ўйнаганмиз. Бу ерда эса ўз ишқибозларимиз бўлади. Уларнинг қўллаши бизга ёрдам бериши керак.

- Фернандеснинг соғлиғи қандай? У «Терек» билан бўладиган ўйингача оёққа турадими?

- Шу кунларда умумий гуруҳ машғулотларига қўшилиши керак.

- Олег Яровинскийнинг айтишича, ЦСКА икки нафар кучли ҳужумчи билан музокара олиб борган экан. Икки фронтда ўйнаб, бир форвард билан қолиш қийин эмасми?

- Таркибимизда Страндберг, Ионов бор. Ахир Ойдан келмаганман. Клуб қандай шароитларда яшаётганини яхши биламан. Имкониятимиз нимагадир етса, яна бошқасига етмаслиги мумкин. Сўнгги йилларда бор эътибор стадион қурилишига қаратилганди. Албатта, мураббий сифатида жамоамда топ футболчилар бўлишини истайман. Лекин вазиятни ҳам инобатга олиш керак. Тўғри, Траоре ва Страндбергдан бошқача усулда ўйнайдиган, Мусо ёки Думбияга ўхшаш ҳужумчи бўлганида ёмон бўлмасди.

- Бразилия матбуотида Витиньонинг ортга қайтаётгани ҳақида ёзишди...

- Бу ҳақда гап бўлмаган. Аввалига унинг қайтиши қишга режалаштирилганди.

- Фотосуратчилар «Откритий Арена»да Станислав Черчесов билан гаплашиб ўтирганингизни суратга олишганди. Гап нима ҳақида бўлди?

- Ҳақиқатан ҳам суҳбатлашдик.

- Терма жамоа ҳақида гап кетдими?

- Йўқ.

И.ИСРОИЛХОНОВ тайёрлади

Леонид Слуцкий: «Вазиятга қараб, футболчи оламиз»