Vitali Levchenko: "O'yin qiyin bo'lishini kutgandik. Chunki bu "Paxtakor" va unda eng yaxshi futbolchilar yig'ilgan. "Sherlar"ning "Dinamo"ga qarshi Kubokdagi o'yinini tahlil qilib, bugungi bahsga tayyorgarlik ko'rdik. Tayyorlaganlarimizni maydonda ko'rsata oldik, yigitlardan minnatdorman".
- "Neftchi" bu mavsum ikkinchi marta "Paxtakor"ni mag'lubiyatga uchratmoqda, buning siri nimada?
- Biz har bir raqibga deyarli bir xil tayyorgarlik ko'ramiz. Shunchaki raqib o'yinlarini ko'p tahlil qilamiz va to'g'ri xulosa chiqarishga harakat qilamiz. "Paxtakor" istisno emas, ularga bo'sh hudud bermaslikka urindik. "Sherlar" ikkinchi bo'limda "Dinamo"ga qarshi bahsdagi kabi vertikal o'ynay boshlashdi. Biz bunga tayyor edik, yigitlar oldilariga qo'yilgan vazifani uddalashdi.
- Birinchi bo'limda "Neftchi" ko'proq hujum qildi, ammo ikkinchi bo'limda va goldan oldin "Paxtakor" hujumda faol edi. Bu sizning ko'rsatmangizmidi?
- Yo'q, "Paxtakor" agressivroq o'ynay boshladi, chunki hisob ularni qoniqtirmasdi. Biz himoyalanib, qarshi hujumga tayandik.
- "Paxtakor" ustidan qozonilgan g'alaba "Neftchi"ni chempionlik poygasiga qaytaradimi?
- Biz avvalgi bahslarda ham har bir ochko uchun kurashgandik, bu o'yinda ham shunday bo'ldi. Uchrashuvlar hali ko'p. Jadvalning pastki qismidagilar har bir ochko uchun jon-jahti bilan kurashadi. Buning ustida "Navbahor" va "Nasaf"ga qarshi o'yinlar bor. Biz poygada edik, bazida omadimiz keldi, bazida yo'q.
- "Neftchi"ning maqsadi chempionlikmi yoki kuchli uchlikda bo'lishmi?
- Keling balandparvoz gaplarni aytmayman. Maqsadimiz - har bir o'yinda g'alaba qozonishga urinish. Mavsumni oxirida ko'ramiz, qaerda bo'lar ekanmiz.
- "Neftchi" davralar oralig'ida bazi kuchli futbolchilaridan ayrildi, tanaffusdan so'ng ushbu o'yinchilarsiz o'ynash qanchalik qiyin bo'ldi?
- Biz futbolchilarning mahoratiga emas, jamoaviy o'yinga tayanamiz. "Neftchi"ni liderlar tark etgan bo'lsada bu natijalarga tasir qilmadi.
- "Neftchi" joriy mavsum Superligada mag'lub bo'lmagan yagona jamoa bo'lib turibdi. Bu "Neftchi"ga bosim beradimi yoki ahamiyatsiz statistikami?
- Natija, turnir jadvalidagi holat bizga bosim o'tkazmaydi. Hammasini yaxshi tushunib turibmiz. Tarkibimizda bunday holatlarni boshidan o'tkazgan tajribali o'yinchilar bor. Shuning evaziga har bir o'yinda faqat g'alaba uchun o'ynaymiz. Bosim yo'q.
Izohlar