Avvalo, O'zbekiston superkubogi haqida qisqacha malumot berib o'tmoqchimiz. Rivojlangan mamlakatlarda futbol mavsumini mamlakat chempioni va kubogi sohibi o'rtasidagi superkubok bahsi ochib beradi. Bizda bu hol bungacha atigi bir marotaba 1998 yilda kuzatilgan. O'shanda mamlakat chempioni “Paxtakor” va kubok sohibi “Navbahor” jamoalari Farg'ona shahrida kuch sinashishgan va yakunda namanganliklar 4:2 hisobida zafar quchishgan edi. Demak, bu safargi O'zbekiston superkubogi ikkinchi bor joriy etilmoqda.

Superkubok uchun bahs “Lokomotiv” va “Bunyodkor” jamoalarining o'zaro hisobdagi 15-uchrashuvi sifatida qayd etiladi. Bungacha o'tkazilgan 14ta o'yinning 8tasida “qaldirg'ochlar”, 2tasida “temiryo'lchilar” g'alaba qozonishgan. Qolgan 4ta o'yinda esa kuchlar teng kelgan. To'plar farqi – 27:13, “Bunyodkor” foydasiga.
O'zaro o'yinlar to'purari Server Jeparov va Oleksandr Pishur hisoblanadi. Bu ikki futbolchi “Lokomotiv” darvozasini to'rt marotabadan aniq nishonga olishgan.

Superkubok uchrashuviga bosh hakam etib tayinlangan Ravshan Ermatov “Lokomotiv” va “Bunyodkor” qarama-qarshiligidagi o'z ko'rsatkichini yanada yaxshilab olish imkoniyatiga ega. U bungacha o'zaro o'yinlarda to'rt marta referilik qilgan.

“Qaldirg'ochlar” va “temiryo'lchilar”ning o'zaro o'yinlariga – JAR, MHSK, Toshkent temir yo'llari muhandislari instituti va “Lokomotiv” stadionlari mezbonlik qilgan.

7 mart kuni bo'lib o'tadigan “Lokomotiv” va “Bunyodkor” uchrashuvining yana bir qiziq tomoni “temiryo'lchilar” ustozi Vadim Abramov bilan bog'liq. U klub bosh murabbiyi sifatidagi so'nggi rasmiy uchrashuvini aynan “Bunyodkor”ga qarshi 2010 yilning 9 aprel sanasida o'tkazgan edi. Etiborlisi, uzoq tanaffusdan so'ng yana “Lokomotiv”ga bosh murabbiy bo'lib qaytgan Vadim Karlenovichning klubdagi bu safargi uchrashuvi “Bunyodkor”ga qarshi bahsga to'g'ri kelmoqda.

O'ylaymizki, 2014 yilgi O'zbekiston superkubogi uchrashuvi muxlisu mutaxassislarda katta qiziqish uyg'otadi va bunga javoban jamoalar chiroyli futbol namoyish etib berishadi.

TAS-IX hududida

TAS-IX hududida

“Lokomotiv” – “Bunyodkor”. VIDEO prevyu