Bilasiz, ayni paytda barcha qitalarda Jahon chempionati-2018 saralash bosqichi davom etmoqda. Jumladan, Afrikada ham terma jamoalar kelasi yili Rossiya yashil maydonlarida o'tkaziladigan mundial yo'llanmasi uchun bahs olib borishmoqda.

O'tgan yili O'zbekiston terma jamoasi bilan o'rtoqlik o'yinida maydonga tushgan Burkina Faso terma jamoasi o'z oldiga mudial chiptalaridan biriga ega chiqishni maqsad qilgan. Ushbu yurt bosh jamoasi “Lokomotiv” safida Osiyo Chempionlar Ligasi hamda O'zbekiston chempionati bellashuvlarida ishonchli o'yin ko'rsatib kelayotgan Muhammad Koneni navbatdagi uchrashuvlariga taklif etdi.

Aslida Kot-d’Ivuarda tavallud topgan 23 yoshli himoyachi ayni paytda Burkina Faso pasportiga ham ega. Shu sababli burkinaliklar ustozi Koneni oldindagi ikki uchrashuvga chaqirishni lozim topdi.

Burkina Faso terma jamoasi mundial saralashining D guruhida ishtirok etmoqda va 4 ochko bilan jadvalda birinchi pog'onada ketmoqda. Burkinaliklar 2 sentyabr kuni Senegal maydoniga safar uyushtirishsa, 5 sentyabrda o'z uylarida senegalliklarni qabul qilishadi. Ushbu uchrashuvlarda Muhammad Kone ham ishtirok etish uchun chaqirildi.

Takidlash joizki, Burkina Faso o'rin olgan guruhda yana Janubiy Afrika Respublikasi terma jamoasi hamda Kabo Verde termalari ham bor.

Muhammad Konega oldinda turgan uchrashuvlarda omad tilaymiz.

“Lokomotiv” himoyachisi Burkina Faso terma jamoasiga chaqirildi