Клублар ўртасидаги жаҳон чемпионати бошланишига икки ҳафта қолганида янгиланган турнирнинг сўнгги иштирокчиси маълум бўлди. Бу Уго Льорис ўйнаётган "Лос-Анжелес" ва ўтиш ўйинларида Мексиканинг "Америка"сига қарши ўйинда ғалабани тортиб олган Оливье Жиру бўлди.

Эслатиб ўтамиз, Хамес Родригес ўйнаётган Мексиканинг "Леон" клуби таъқиққа учрагани сабаб клублар ўртасидаги ЖЧдаги сўнгги ўрин бўш қолганди.

МЛС клуби 89-дақиқада ўзини-ўзи қутқарди ва сўнгра ғалабани илиб кетди. Энди улар КЖЧни "Челси"га қарши ўйин билан бошлайди

"Лос-Анжелес" 2023 йилги КОНКАКАФ Чемпионлар Лигаси финалида иштирок этгани ва унда айнан "Леон" жамоасига мағлуб бўлгани сабаб ўтиш ўйинларига тушиб қолди. "Америка" танлаб олинди, чунки бу клуб сўнгги тўрт йил ичида КОНКАКАФ коэффициентлари рейтингида ҳали турнирда иштирок этмаганлар ичида етакчилик қилмоқда.

Аммо жамоалар турли ҳолатларга тушиб қолишди: "Лос-Анжелес" ўз уйида ўтиш ўйинини ўтказди (чипталар клублар ўртасида тенг тақсимланган бўлса ҳам), "Америка" эса Мексика чемпионатининг қийин плей-офф босқичидан сўнг дарҳол етиб келди ва жамоа у ерда Клаусуранинг икки ўйинлик финалига чиқди (мағлубият - 0:0 ва 0:2).

"Америка" барибир клублар ўртасидаги жаҳон чемпионатига бир қадам қолганди. Мексикаликлар 64-дақиқада Браян Родригеснинг пенальтидан урган голи эвазига ҳисобда олдинга чиқиб олишди.

Аммо "Лос-Анжелес" ўйин охирида барчасини ўзгартириб юборди: 89-дақиқада бурчакдан узатилган тўп Игор Жезуснинг бош билан йўллаган аниқ зарбаси билан якунланди. Шу тариқа ўйин қўшимча бўлимларга уланиб кетди ва америкаликлар 115-дақиқада келиб рақибга зарба берди.

Ғалаба тўпи "Сент-Этьен" собиқ футболчиси Дени Буанга ҳисобига ёзилди. Оливье Жиру ҳам ҳал қилувчи ҳужумда иштирок этди.

"Бу мавсумдаги энг яхши ўйин бўлса керак. Гарчи хатоларга йўл қўйилган бўлса-да, - деди ўйиндан сўнг "ЛА" бош мураббийи Стив Черандоло. - Бу ғалаба клубимизни янги босқичга олиб чиқади ва бутун лигага ёрдам беради, чунки МЛС клублар ўртасидаги ЖЧда яна бир жамоага эга бўлди".

Аслида, бу камида 9,55 миллион долларлик ўйин бўлди. Бу КЖЧ иштирокчиларига кафолатланган кириш бонуси. "Лос-Анжелес" D гуруҳидан ўрин олди: дастлабки турда "Челси" кейин эса Туниснинг "Эсперанс" ва Бразилиянинг "Фламенго" жамоалари тўқнаш келишади.

Клуб МЛСда ҳозирда Ғарбда олтинчи ўринни эгаллаб турибди ва рақибларидан 1-2 та кам ўйин ўтказган.

Хамес ва "Леон"ни нега четлатишди?

Турнирда битта мулкдор ёки юридик шахсга тегишли иккита клуб бўлиши мумкин эмас эди. "Леон" таъқиқи бўйича якуний қарор бир ой олдин қабул қилинган: апелляция эса рад этилган.

Grupo Pachuca компанияси "Леон" ва "Пачука"га эгалик қилади. Мексикалик бизнесмен Хосе де Хесус Мартинес Патиньо "Пачука"ни 1995 йилда, "Леон"ни эса 2011 йилда, жамоа иккинчи дивизионда бўлганида сотиб олган. ESPN’нинг ёзишича, тижорий реестрда Патино "Леон"нинг 55 фоиз ва "Пачука"нинг 50 фоиз акцияси эгаси сифатида қайд этилган.

Мексика чемпионатида узоқ вақт кўз юмилди, аммо 2027 йилга келиб у ерда ҳам бир нечта клубга эгалик қилиш мумкин бўлмай қолади. Шу сабабли, Патино "Леон"ни сотмоқчи бўлган ва клублар ўртасидаги ЖЧда иштирок этиш билан боғлиқ муаммолардан қочмоқчи эди. Қуръа ташлашдан олдин у шундай деган эди: "Биз ФИФАга Мексика чемпионатидаги клублар хўжайинлари йиғилишида "Леон"ни сотиш режаси ҳақида маълум қилганимизни айтдик".

Аммо иш бундан нарига ўтмади: ҳукумат маълумотларига кўра, улушлар тақсимоти ўзгармаган, бирорта клубда янги хўжайин пайдо бўлмаган. Март ойида ФИФА ўз расмий сайтида қарорини эълон қилди. Патино CASга мурожаат қилди - ва у ерда ҳам ташкилотчилар тарафини олишди.

Шу тариқа Хамес Родригес КЖЧдан қуруқ қолди. Аммо, эндиликда у ерда Жиру ва Льорисни кўрамиз.

"Лос-Анжелес" клублар ўртасидаги жаҳон чемпионатига сўнгги бўлиб йўл олди. 10 миллион долларлик камбэк (мутолаа учун)