- Ukraina terma jamoasi iroda namoyish etib, Islandiyani mag'lub etdi va Evro-2024 yo'llanmasini qo'lga kiritdi. O'yin haqidagi fikrlaringiz bilan bo'lishsangiz...

- O'yin menga yoqdi. Ikki terma jamoa ham yaxshi futbol namoyish etdi. Tezkor futbol guvohi bo'ldik. Islandiya terma jamoasi ko'proq himoyalanishini kutgan edim, ammo bunday bo'lmadi. Ukraina esa ko'proq to'pga egalik qilishni istaydi. Yaratganga shukur, yakun muvaffaqiyatli bo'ldi. Ukraina bosim qildi va bahs so'ngida irodali g'alabani qo'lga kiritdi. To'g'ri, Ukraina terma jamoasi ko'p vaziyatlar yaratmagan bo'lishi mumkin, ammo bunday uchrashuvlarda xato qiymati juda baland. Kichik xato sababli Evropa chempionatidan quruq qolish mumkin.

- Ukraina terma jamoasi Evro-2020da chorak finalga qadar etib borgandi va o'z o'yini bilan neytral muxlislar qalbidan joy olgandi. Yangi tarkib Evro-2024da ham ushbu natijani takrorlay oladimi? Nima deb o'ylaysiz?

- Bu savolga hech kim aniq javob bera olmasa kerak. Turnir davomida bilib olamiz. Hozirgi tarkib bilan uzoqroq borishimiz kerak. Chorak final bosqichiga qadar etib borish – uddalasa bo'ladigan vazifa. Individual mahoratli futbolchilar tarkibda ko'p. Qanday natija qayd etilishini turnir davomida bilib olamiz va albatta muxlislik qilamiz. Ukraina Evro-2024 yo'llanmasini qo'lga kiritdi va dastlabki missiyani bajardi, endi esa keyingi maqsadlarga erishish kerak.

Eslatib o'tamiz, Ukraina terma jamoasi Evro-2024da Belgiya, Slovakiya va Ruminiya terma jamoalari bilan bir guruhdan joy oldi.

Abdulvosit Bektemirov suhbatlashdi

Maksim Shackix: "Ukraina terma jamoasi hozirgi tarkib bilan Evroda uzoqqa borishi mumkin"