Фарғонада чемпионатимизнинг икки азалий рақиблари "Нефтчи" - "Пахтакор" учрашади. Бу ўйинга ўтишдан олдин жамоаларнинг биринчи турдаги ўйинларига қисқача хулоса берамиз.

"Нефтчи"

Бекободда чемпионат стартига икки хил кайфиятда етиб келган жамоалар тўқнашди. Суперлиганинг 13та жамоаси қишни Анталия, Дубайда ўтказган бир паллада "Металлург" қорли ва сифатсиз майдонларда шуғулланди. Одатдагидек жамоалар спарринг рақиб сифатида кўрилди. "Нефтчи" 40 кун давомида Туркияда ўзидан бир бош баланд рақибларга қарши майдонга чиқди. Тараддуд кўнгилдагидек кечди. Бу хатто ўйин давомида ҳам сезилдики, Виталий Левченко футболчиларни яхшилаб тоблаган. "Металлург"нинг сиёсати ўтган йили асосий эътиборни ёшларга қаратиш, таркибни маҳаллий футболчилардан шакллантириш эди. Лекин Луисма Эрнандес бу билан натижа қила олмаслигини сезди шекили, хорижлик футболчиларни жалб қилди. "Нефтчи"да футболчилар яхлитлиги бор. Тарқоқлик кўзга ташланмади. Майдонда ўзаро тушуниш яхши даражада. Футболчилар ўзларининг кучли томонларидан фойдалана олишяпти. Фарғоналиклар бу ўйингача сўнгги бор Бекободда 2015 йилги мавсумда ғалаба қозонган эди. Демак серияга барҳам берилди.

"Пахтакор"

Қайсидир маънода кутилган ва кутилмаган натижа қайд этилган учрашув. Кутилмаган бу таркибдаги футболчиларнинг тажрибаси ва даражаси бўйича "Пахтакор"нинг устунлиги, кутилгани Тимур Кападзенинг жамоаси ўтган йили ҳам иккита баҳсда етарлича қаршилик кўрсатиб очко олгани ва рақибининг таркибидаги муаммолари. Дарҳақиқат, ҳозирда Максим Шацкихни ўйлантираётган айрим жиҳатлар йўқ эмас. Биринчиси ҳужум, шу куни асли вингер Сардор Рашидов соф форвард ролида пайдо бўлди. Минг қилса ҳам унда нуқта қўядиган ҳусусият кам. Банашак яхши ҳужумчи, лекин жароҳатга мойилигги борлигини гувоҳи бўлдик. Кузга бориб ОЧЛда иштирокини бошлайдиган "Пахтакор" ёзги трансферлар ойнасида яхши ҳужумчи олиши кераклигини айтиш жоиз. Черандан хужумчи ролида фойдаланар, лекин халқаро майдонда Черанга қарши катта савиядаги ҳимоячилар ўйнайди.

Иккинчи муаммо захира ўриндиғининг торлиги. Ўша куни Шацкихда захирадан ўйинга тушиб кучайтирадиган номинал 2та вариант бор эди. Ҳамралиев ва Холматов. Диёрбек Ортиқбоев, Аббос Файзуллаев, Шаҳриёр Жабборов, Беҳруз Асқаров U-20 терма жамоасида. Энди айтингчи Макс кимни туширсин?

Учинчи муаммо марказий ҳимоя. Шерзод Аъзамовнинг йўқлиги яққол сезилаётганини, орқа чизиқда етакчи ўйинчиннг етишмаётгани кундек равшан. Азмиддинов ва Турсунов тандеми етарлича самара бермаётгандек. "Олимпик" урган голларда ҳимоячиларнинг хатолари катта таъсир ўтказди.

"Пахтакор" "Нефтчи"ни Суперлигадаги сўнгги 6 мавсумида 2 маротаба мағлуб этган. Бу анъана ўтган йили Максим Шацких даврида барҳам топди. 4та учрашувнинг 2тасида фарғоналиклар ғалаба қозонган бўлса, 2та баҳсда дуранг қайд этилган. Умумий олганда ҳам Фарғонада кечган ўйинларда "Нефтчи" устун. 27 учрашув, 14та ғалаба, 7 дуранг ва 6 мағлубият.

23.03.2014. "Нефтчи" - "Пахтакор" 1:2
30.09.2015. "Нефтчи" - "Пахтакор" 3:2
15.10.2016. "Нефтчи" - "Пахтакор" 1:0
08.03.2017. "Нефтчи" - "Пахтакор" 0:0
12.06.2018. "Нефтчи" - "Пахтакор" 1:1
12.08.2022. "Нефтчи" - "Пахтакор" 0:2

Максим Шацкихни қийнаётган муаммо нима? Бекободда тезлик олган "Нефтчи" Фарғонада юришни давом эттирадими?