"Стадионни тўлдириб ўтирган мухлисларга ғалабани тақдим этганимиздан жуда хурсандмиз. Иккинчи бўлимда катта куч билан олдинга ўтдик ва голлар урдик. Кейинчалик эса ташаббусни рақибга бериб қўйдик. Биз ғалабани эртароқ нишонлавордик, чамамда. Лекин мен 2:0 ҳисобини жуда қалтис деб биламан. Одатда ҳисоб 2:0га ўзгарганидан сўнг футболчилар ўзини эркин ҳис қилиб юборади. Шуни ҳисобига ўйинимизда озгина пасайиш бўлди. Аммо биз керакли ғалабага эришиб олдик. Бу бошланиши. Кейинги ўйинларда ҳам Худо хоҳласа ғалабаларга эришамиз ва мухлисларимизни қувонтириб юришни истаймиз. Шуни жуда хоҳлардимки, ҳар доим минглаб ишқибозларимиз стадионни тўлдириб ўтиришса. Биз ҳам қўлдан келганча ғалабаларни уларга совға қиламиз. Туғилган кунимда ўзим гол ураман деб астойдил ҳаракат қилганим йўқ. Муҳими бу жамоамизнинг ютуғи. Тўғриси, ўйиндан олдин яхши ният қилгандим. Гол уришни истагандим, аммо айнан гол уриш учун эмас, жамоамиз фойдасига хизмат қилиш мақсадида ҳаракат қилдим. Туғилган куним қўшалоқ байрамга айланди. Бундан албатта жуда бахтиёрман. Ҳакам хуштагидан сўнг барчамиз бир-биримизни табрикладик. Одатдагидек мураббий ҳам ҳаммани ғалаба билан муборакбод этди. Энди эса кейинги ўйин ҳақида ўйлашни бошлаймиз ва бор эътиборни шунга қаратамиз", - дейди Мақсуд Каримов.

Мақсуд Каримов: "Туғилган куним қўшалоқ байрамга уланиб кетди"