Ayniqsa, 2002 yilgi JCH saralashi doirasidagi Xitoyga qarshi so'nggi o'yin muxlislarning hali ham yodida bo'lsa, ajab emas. Gap shundaki, so'nggi o'yinda ham bizda hech bo'lmaganda pley-offga chiqish uchun nazariy imkoniyat bor edi. Buning uchun termamiz bu bahsda g'alaba qozonishi, guruhdagi boshqa raqiblarimiz hisoblangan, BAA - Ummon bahsida esa mehmonlarning qo'li baland kelishi kerak edi. Uchrashuvning so'nggi daqiqalari o'tib borayotganda, Shirshov xitoyliklar darvozasini uzoq masofadan ishg'ol qildi va bu quvonchini muxlislar bilan baham ko'rdi. Bu xursandchilikning sababi esa stadionda BAA - Ummon bahsida, mehmonlarning qo'li baland kelgani haqida noto'g'ri malumot ketgani sabab bo'lgan edi. Keyinchalik esa, g'alaba qozonganimizga qaramay pley-offga ilina olmaganimiz oydinlashgandi.

Futbolchilik faoliyatini yakunlagach, Shirshov Rossiyada yosh futbolchilarga murabbiylik qilib kelayotgandi. 2021 yilning 28 dekabr kuni noxush xabar barcha o'zbekistonlik futbol muxlislarini ranjitdi: Nikolay Shirshov vafot etdi...

Uning o'yinlarini ko'rib katta bo'lgan insonlar bunga ishonishmasdi. Afsuski endi u oramizda yo'q. Bir necha yil davomida "Paxtakor" klubida to'p tepgan Nikolay Shirshovni "xalq jamoasi" yodidan chiqarib qo'ygani yo'q.

29 iyun kungi "Bunyodkor"ga qarshi bahsda muxlislar xarid qilgan chiptalardan tushgan mablag' to'lig'icha Nikolay Shirshovning oilasiga o'tkazib beriladi. Shunday ekan chorshanba kungi bahsda stadionga tashrif buyurishni va o'zbek futboli afsonalaridan birining oilasini qo'llab-quvvatlashga o'z hissangizni qo'shingizni so'rab qolamiz.

Eslatib o'tamiz, "Paxtakor" - "Bunyodkor" uchrashuvi 29 iyun kuni soat 20:00da "Paxtakor" stadionida boshlanadi.

Marhum Nikolay Shirshov oilasiga yordam berishni xohlaysizmi? "Paxtakor" - "Bunyodkor" uchrashuviga marhamat!