Кечаги кунги машғулотидан сўнг жамоанинг сербиялик ярим ҳимоячиси Марко Станоевичнинг фикрлари билан қизиқдик.

"Жамоамиз ОФК кубоги баҳсларига тайёр, дея оламан. Тожикистонда иккита машғулот ўтказишга улгурдик. Майдонга мослашяпмиз. Ўйлайманки, ҳаммаси яхши бўлади. Ҳа, таркибимизда ёш футболчилар, бундай мусобақада илк бор иштирок этаётганлар ҳам бор. Фикримча, бу бизга мақсадимизга эришиш учун тўсқинлик қилмайди. Ички чемпионат баҳслари орқали кўпчилик бунга амин бўлди.
Рақиб ким бўлишидан қатъий назар фақат ғалаба иштиёқида майдонга тушамиз. Мусобақада ўзимнинг энг яхши ўйинларимни кўрсатишга ҳаракат қиламан. Ўзбекистон чемпионатида ураётган голларимни бу ерда ҳам такрорлашга уриниб кўраман. Муҳими жамоам ғалабаси ва мухлисларимизнинг хурсандчилиги.
Мақсадимиз гуруҳдан чиқиш. Бундай турнир ёш футболчиларга ўзини кўрсатиши учун ҳам ажойиб имконият.
Молиявий рағбат? Тожикистонга кетишимиздан олдин раҳбарият жамоа билан учрашди. Омад тилади. Умуман олганда молиявий рағбатни эмас, кейинги босқичига чиқишни ўйлаяпмиз",- дейди Марко Станоевич.

Марко Станоевич: "Молиявий рағбатни эмас, гуруҳдан чиқишни ўйлаяпмиз"