Uchrashuvdan so'ng jamoa murabbiyi Dilyaver Vaniev klub rahbarlaridan istefo so'rashini malum qildi. Biz bu borada "Mashal" direktori Ilhom Qurbonovga yuzlandik.

"Dilyaver Vanievga ikki kunga uyiga javob berib yubordik. Loyihamizda yangi murabbiy olib kelish o'rin olmagan. Albatta, o'tgan o'yinlarni murabbiylar shtabi bilan birgalikda tahlil qilib chiqamiz. Ko'rayotgan bo'lsangiz o'yin, vaziyatlar yaratish borasida mag'lub bo'lmayapmiz. Tarkibimizdagi 80 foiz futbolchilar Superligada bu yil debyut qildi. Ular hali Superligada o'ynamagan edi.

Aytganimdek yangi murabbiy olib kelmaymiz, faqat maslahatchi yoki yordamchi kuch jalb qilishimiz mumkin. Oldindagi o'yinlarda Dilyaver Vanievga ishonishda davom etamiz. To'g'ri, qiyin raqiblar bilan o'yinlar kutmoqda. "Paxtakor" bilan o'yinda ham ijobiy natija uchun harakat qilamiz. Qo'lni tushirmaymiz. Bu qiyin holatdan chiqib ketishga harakat qilamiz.

Maosh bilan bog'liq muammolar bizga o'xshagan bir nechta jamoalarda ham bor. "Bunyodkor", "Nasaf" ham shu holatda to'p tepmoqda va yaxshi natijalar qayd etyapti. To'g'ri, bu jamoalarda akademiyasidan chiqqan yigitlar 3-4 yildan Superligada birga to'p tepmoqda. Agarda yuqoridagi jamoalar ham mag'lubiyat ko'chasiga kirib qolganida maosh bilan bog'liq muammolarni sabab qilib ko'rsatsak bo'lardi. Maosh bahona emas. Ovqatlanish, mashg'ulotlar, maydonlar va boshqa tashkiliy ishlarni, sharoitlarni qo'limizdan kelganicha yaratib berishga harakat qilyapmiz. Bu borada hech kimda nolish yo'q.

Tarkibimizdagi iqtidorli yoshlarga ishonamiz. Ularning kelajagi bor. Hujum chizig'imizda ayrim muammolar borligi sababli ikkinchi davrada Humoyun Murtazoevni ortga qaytardik. Lekin, u ham jarohatlar sabab ko'p o'yinlarni o'tkazib yubordi",-deydi Ilhom Qurbonov.

Abdulaziz Iskandarov yozib oldi.

"Mashal" direktori Ilhom Qurbonov: "Loyihamizdan yangi murabbiy olib kelish o'rin olmagan"