Bugun Odil Ahmedov, Bahodir Nasimov va Vitaliy Denisov mashg'ulotlarga qo'shildilar. Anzur Ismoilovni esa klubi hamon qo'yib yubormagan. 8 mart kuni "Chanchun Yatay" klubini Xitoy superligasida muhim uchrashuvi borligi sabab, xitoyliklar futbolchimizni qo'yib yuborishni istashmayapti. Kim biladi, balki "Chanchun Yatay" bosh murabbiyi rafiqasiga ayollar bayramiga g'abala sovg'a qilishni maqsad qilganmi?

BAA terma jamoasi safida yuqori texnikaga ega futbolchilar etarlicha topiladi. Shu boisdan mashg'ulot davomida amirliklarga qarshi bir nechta taktikalar ustida ish olib borilyapti. Ismoilovning yo'qligi uchun Ahmedov markaziy himoyachi vazifasini o'tadi.

Avvaliga terma jamoamiz azolari uchga bo'lingan holda bir zarba uslubida to'p oshirish, pressing qo'llash, to'pni qaytarish kabi mashg'ulotlarni bajardilar. Keyin ikki guruhga bo'linishdi.

Qizillar: Nesterov, Rashidov, Kozak, Shorahmedov, Ahmedov, Jo'raev, Nasimov, Nagaev, Tursunov, Musaev va futbolchi etishmasligi sabab Maqsudov.

Ko'klar: Suyunov, Denisov, Xoshimov, Jeparov, Iskanderov, To'xtaxo'jaev, Hasanov, Sergeev, Shodiev, Mullajonov, Haydarov.

Maydonning birinchi yarmida bo'lib o'tgan kichik uchrashuvdan keyin tarkiblarda o'zgarish bo'lib o'tdi. Ikki markaziy himoyachi Ismoilov va Krimecni safdan chiqishi bosh murabbiyning rejalariga o'zgartirish kiritishiga sabab bo'lyapti. Keying tarkib quyidagicha ko'rinish oldi. Hozirgi holatdan kelib chiqib, asosiy tarkib desa ham bo'ladi:
Suyunov, Denisov, Ahmedov, To'xtaxo'jaev, Xoshimov, Haydarov, Rashidov, Jeparov, Tursunov. Hujum chizig'ida Shodiev va Nasimov.

Darvozabonlar bilan shug'ullangan Pyotr Gizimchukning ish uslubida o'sishni ko'rishimiz mumkin. O'zim darvozada turishini yoqtirganim uchun bo'lsa kerak, bu amplua vakillarining mashg'ulotlarini qiziqqish bilan tomosha qilaman. Shu kungacha Gizimchukning mashg'ulotlari biroz zerikarli va oddiy ko'rinar edi. Ammo so'nggi 4 kundan kelib chiqib aytadigan bo'lsam, ancha qiziq va darvozabonlarga ham maqul kelyapti. O'sish bor.

Yaqinda klub matbuot xizmati xodimlari uchun mahsus seminar bo'lib o'tdi. O'zim ishtirok eta olmadim. Shu fursatdan foydalanib, bir narsani iltimos qilardimki, futbolchilaringizga intervyu berish madaniyati va uning qonun qoidalarini o'rgating. Nega faqat legionerlardan intervyu olasizlar deydiganlar ko'p, ammo o'zimiznikilar gapirishni bilmasa nima qilaylik.

Ertaga terma jamoamiz "Bunyodkor" stadionida mashg'ulot o'tkazadi.

Nodirxo'ja Yuldashev

Mashg'ulotlarda hamma jam, faqat Anzur kam